Netthandel og fysiske butikkar Sjølv om andelen kjøp framleis er størst i fysiske butikkar, så veks netthandelen stadig. Dette treng ikkje å bety at det ikkje er mogleg å drive handel i eit bysentrum i dag, men butikkane si rolle vil mest sannsynleg endre seg. Det vil vere høgare krav til personleg og tilpassa service, og eit oppsett der butikkane i større grad blir eit utstillingslokale («showroom») der nettbutikken er hovudkjelda til inntekt. Dette kan også gjerast i Nordfjordeid. Fordi netthandelen aukar, vil vi også sjå ei utvikling i ulike distribusjonsformer som heimelevering, pakkeboks mm. Nordfjordeid ligg sentralt plassert og kan, dersom ein fokuserer på å reindyrke staden som regionsenter, kunne fungere som ein «hub» for distribusjon.

Kjøpesenter Omsetning av varer går generelt ned i kjøpesentra både i og utanfor sentrum. Byar med store kjøpesenter i sentrum har likevel oppretthalde varehandel i større grad enn byar som ikkje har kjøpesenter i sentrum. Også eksterne kjøpesenter rettar seg meir mot tenester og opplevingar. Nordfjordeid har kjøpesenter i sentrum, og har difor gode føresetnader for å kunne oppretthalde varehandel i sentrum.

Berekraftig handel Vi ser at det i større grad blir viktig å leggje til rette for meir berekraftig handel, gjenbruk og reparasjon av ting. Nordfjordeid har eit sentrum som kan vere med på å byggje opp under berekraftig handel, gjenbruk, reparasjon og anna verksemd knytt til desse trendane. Særleg Eidsgata har ein struktur og utsjånad som mange verksemder knytt til berekraftig handel truleg vil vere tiltrekt av.

Tenester Ein generell trend er at omsetning i handel i sentrum går ned og omsetning i tenester går opp. I perioden frå 2013 har det skjedd ein overgang i forbruket frå kjøp av varer til kjøp av tenester. I Noreg har vi fått eit høgare velstandsnivå og bruker difor meir pengar på opplevingar, kultur, helsetenester, aktivitetar og service av ulike slag. Vi ser at bysentrum har godt potensial for å utvikle tilbod av tenester innan servering, kultur, helse, aktivitet og opplevingar. Omsetning av tenesteyting aukar mest i byar med attraktive byrom, sjøfront, høg bygningsmessig kvalitet og høg andel turistar og/eller studentar. Kontor og bustad i sentrum er sterkt bidragsytande til å skape aktivitet i sentrum. Nordfjordeid har gode tilbod av tenester i dag, men dei er spreidde.