ᐃᓄᐃᑦ ᐱᔪᓐᓇᐅᑎᖏᑦ ᐊᒻᒪ ᐃᒪᒃᑯᑦ ᐅᒥᐊᕐᔪᐊᓕᕆᓂᕐᒧᑦ ᒪᓕᑦᑕᐅᔭᕆᐊᓖᑦ ᐅᑭᐅᑕᖅᑐᒥ ᐃᒪᖏ

||  Français  || ||  Inuinnaqtun  || ||  English  ||

ᐊᒥᓱᓄᑦ ᓄᓇᕗᒻᒥᐅᓄᑦ – ᐃᓄᐃᑦ ᓄᓇᕗᒻᒥᐅᑕᐃᑦ – ᐃᒪᐃᓐᓇᐅᑎᓪᓗᒍ ᑐᑭᖃᖅᑐᖅ ᐅᓪᓗᐃᑦ ᑕᑭᔫᑎᐅᓪᓗᑎ ᑭᓯᐊᓂ ᕿᓚᒥᐅᓪᓗᑎ ᐃᖃᓗᒐᓱᐊᖅᑐᓂ, ᐊᖑᓇᓱᐊᖅᑐᓂ, ᐊᒻᒨᒪᔪᑕᖅᑐᓂ, ᓄᓂᕙᑦᑐᓂ ᐊᒻᒪ ᐅᒥᐊᕐᑐᖅᑐᓂ ᐃᕝᕕᑦ ᐃᓚᖏᓐᓂ ᐊᒻᒪ ᐱᖃᓐᓇᖏᓐᓂ. ᓯᑯᖃᖏᑦᑐᖅ ᐃᒪᖅ ᑐᑭᖃᕐᒥᔪᖅ ᐊᒥᓱᕈᕆᐊᖅᓯᒪᔪᑦ ᐃᒪᒃᑯᑦ ᐃᖏᕋᓂᐅᔪᑦ, ᐃᓚᖏᑦ ᓂᕆᐅᒋᔭᐅᓪᓗᑎ ᐊᒻᒪ ᐊᓯᖏᑦ ᐋᒡᒐ.

ᑖᓐᓇ ᐅᓂᒃᑳᑦ ᓄᓇᖑᐊᖅ ᓴᓇᓯᒪᓂᖃᖅᑐᑦ ᑐᓂᓯᓗᑎ ᐊᒥᓱᒐᓚᓐᓂᑦ ᐊᒥᓱᓂᑦ ᒪᓕᑦᑕᐅᔭᕆᐊᓕᓐᓂᑦ ᐊᐅᓚᑦᑎᔪᑦ ᑮᓇᐅᔭᓕᐅᕋᓱᐊᖅᑐᓄᑦ ᐅᒥᐊᕐᔪᐊᓄᑦ ᐊᐅᓚᓂᖃᖅᑐᑦ ᐃᒪᖏᓐᓂ ᖃᓂᒋᔭᖏᓐᓂ ᓄᓇᕗᑦ ᓇᓗᓇᐃᖅᓯᓗᑎ ᐃᒪᖅᐸᓯᒻᒦᑦᑐᑦ ᓄᓇᓖᑦ ᑐᑭᓯᒋᐊᕈᑎᓂᑦ ᐱᔭᕆᐊᖃᖅᑕᖏᓐᓂ ᐃᓚᒋᔭᐅᑎᑦᑎᓗᑎ ᐊᐅᓚᑦᑎᖃᑎᒌᓐᓂᕐᒧᑦ ᑖᒃᑯᓇᓂ ᐊᒻᒪ ᖃᐅᔨᑎᑕᐅᓯᒪᔪᓂᑦ ᓴᐳᒻᒥᑦᑎᓂᕐᒧᑦ ᐃᓱᒫᓘᑕᐅᔪᓂᑦ.

ᓴᓇᓯᒪᓂᖃᖅᑐᖅ ᒪᓕᒐᓴᖏᓪᓗᑎ ᐊᑐᐊᒐᐃᑦ, ᓴᖅᑭᖅᑎᑕᐅᓚᐅᖅᑐᖅ ᑭᓕᐅᓰᔅ ᖃᐅᔨᓴᕐᕕᒻᒥ ᑲᒪᒋᔭᖃᑦᑎᐊᓂᕐᒧᑦ ᐃᒪᒃᑯᑦ ᐅᒥᐊᕐᔪᐊᓕᕆᓂᕐᒧᑦ, ᐃᒻᒥᑰᖅᑐᖅ ᖃᐅᔨᓴᕐᕕᒃ ᐃᑲᔪᖅᑐᐃᔪᖅ ᐊᑦᑕᓇᖏᑦᑐᒥ ᐊᒻᒪ ᒪᑭᒪᑎᑕᔅᓴᐅᔪᓂ ᐃᒪᕐᒥ ᐅᒥᐊᕐᔪᐊᓕᕆᓂᕐᒧᑦ ᑲᓇᑕᒥ, ᑐᓪᖓᓂᖃᖅᑐᑦ ᖃᐅᔨᓴᖅᑕᐅᓯᒪᔪᑦ ᐅᑯᓄᖓ ᑕᐅᕼᐅᓯ ᓯᓚᑦᑐᓴᕐᕕᒃᔪᐊᖅ ᐱᓕᕆᖃᑎᖃᖅᑐᑎᑦ ᓄᓇᕗᑦ ᒐᕙᒪᒃᑯᓐᓂᑦ ᐊᒻᒪ ᑮᓇᐅᐅᔭᖃᖅᑎᑕᐅᓪᓗᑎ ᐃᒪᕐᒥᐅᑕᓕᕆᔨᒃᑯᑦ ᑲᓇᑕᒥ. ᑭᓕᐅ ᓰᔅ ᐃᑲᔪᓱᖅᑐᑦ ᑕᒪᑐᒥᖓ ᐃᖅᑲᓇᐃᔮᖑᔪᒥᑦ ᑐᓂᓯᓗᑎ ᖃᓄᐃᓐᓂᕆᔭᖏᓐᓂ ᐃᒪᖅᐸᓯᒻᒦᑦᑐᓂ ᓄᓇᓕᓐᓂᑦ.

ᑖᓐᓇ ᖃᐅᔨᓴᕐᓂᐅᔪᖅ ᐊᒻᒪ ᖃᓄᐃᓐᓂᕆᔭᖏᓐᓄᑦ ᐅᓂᒃᑳᑦ ᓄᓇᖑᐊᖅ ᐱᑕᖃᕈᓐᓇᕋᔭᓚᐅᖏᑦᑐᖅ ᐱᓇᓱᐊᕐᓂᖏᑉᐸᑕ ᐊᒻᒪ ᖃᐅᔨᒪᓂᖏᓐᓄᑦ ᐊᒥᓱᓄᑦ ᐃᓄᓐᓄᑦ ᖃᐅᔨᒪᓂᐅᔪᓂᑦ ᑎᒍᒥᐊᖅᑎᓂᑦ ᐊᒻᒪ ᓴᓇᖑᐊᖅᑎᓂᑦ. ᖁᕕᐊᓱᑦᑐᒍᑦ ᐃᓚᐅᖃᑕᐅᔪᓄᑦ ᑐᓂᓯᓂᖏᓐᓄᑦ ᐃᓄᐃᑦ ᖃᐅᔨᒪᔭᑐᖃᖏᓐᓂ (ᐃᓄᐃᑦ ᖃᐅᔨᒪᔭᑐᖃᖏᑦ).

ᐅᑯᐊ ᐅᓂᒃᑳᑦ ᓄᓇᖑᐊᖅ ᐊᑐᐊᒐᐃᑦ ᑐᓂᓯᔪᑦ ᐃᓚᖏᓐᓂ ᐊᒥᓱᓂᑦ ᒪᓕᑦᑕᐅᔭᕆᐊᓕᓐᓂᒃ, ᐊᑐᐊᒐᐃᑦ ᐊᒻᒪ ᐱᓕᕆᐊᓂᑦ ᐊᐅᓚᑦᑎᔪᑦ ᑮᓇᐅᔭᓕᐅᕋᓱᐊᓂᕐᒧᑦ ᐅᒥᐊᕐᔪᐊᓄᑦ ᐃᖏᕋᔪᑦ ᓄᓇᕗᑦ ᐃᒪᖏᓐᓂ ᐊᒻᒪ ᐊᑦᑐᐊᓂᓕᓐᓄᑦ ᐃᒪᕐᓄᑦ. ᑐᑭᓯᔭᐅᓂᖓ ᒪᓕᒐᖅᑎᒍᑦ ᓴᓇᓯᒪᓂᖓ ᑮᓇᐅᔭᓕᐅᕋᓱᐊᓂᕐᒧᑦ ᐅᒥᐊᕐᔪᐊᓄᑦ ᐃᑲᔪᕐᓂᐊᖅᑐᖅ ᐅᖃᖃᑎᒌᑉᐸᓪᓕᐊᓂᐅᔪᒥᑦ ᒪᓕᑦᑕᐅᔭᕆᐊᓕᓐᓄᑦ ᖃᐅᔨᒪᔭᐅᖏᑦᑐᓂ ᐊᒻᒪ ᐊᑦᑕᓇᕈᑎᐅᔪᓐᓇᖅᑐᓂᑦ ᐊᑦᑐᐊᐃᓂᖃᖅᑐᑦ ᓄᓇᓕᓐᓂᑦ ᐊᒻᒪ ᓄᓇᓕᒻᒥ ᐃᒪᖏᓐᓂ ᐱᓕᕆᔭᐅᔪᓂᑦ. ᓯᕗᓪᓕᐅᔾᔭᐅᔭᕆᐊᓖᑦ ᐅᒥᐊᕐᔪᐊᓕᕆᓂᕐᒧᑦ  ᒪᓕᒐᐃᑦ ᐊᒻᒪ ᐃᒪᕐᒥ ᐊᐅᓚᐅᑦᑎᖃᑎᒌᓐᓂᕐᒥᑦ ᑕᑯᔅᓴᐅᑎᑦᑎᔭᕆᐊᓖᑦ ᐊᒻᒪ ᖃᓄᐃᓕᓯᒋᐊᕐᓂᖃᕐᓗᑎ ᓄᓇᓕᒻᒧᑦ ᐃᓱᒫᓘᑕᐅᔪᓂᑦ ᐊᒻᒪ ᐃᓅᓇᓱᐊᕐᓂᖏᓐᓄᑦ ᐊᒻᒪ ᐊᑯᓂᐅᔪᒧᑦ ᖃᓄᐃᖏᑎᐊᕐᓂᖏᑦ ᐃᒪᕐᒥᐅᑕᐃᑦ ᐆᒪᔪᐃᑦ ᐊᒻᒪ ᓇᔪᖃᑦᑕᖅᑕᖏᑦ.

ᑭᓕᐅ ᓰᔅ ᑮᓇᐅᔭᖃᖅᑎᑦᑎᓚᐅᖅᑐᑦ ᖃᐅᔨᓴᕐᓂᐅᔪᖅ ᐃᖏᕋᓯᑎᑕᐅᓗᓂ ᐊᒻᒪ ᐅᐸᒐᔅᓴᐅᓗᓂ ᓄᓇᓕᒻᒧᑦ. ᖃᐅᔨᓴᖅᑏᑦ, ᐃᒪᐅᑉ ᑭᓪᓕᖓ ᐅᑎᖅᑎᑕᐅᓂᖓᓄᑦ ᓄᓇᕗᒻᒥ ᐱᔭᕇᖅᓯᓚᐅᖅᑐᑦ ᑖᔅᓱᒥᖓ ᐃᖅᑲᓇᐃᔮᖑᔪᒥᑦ ᑮᓇᐅᔭᖃᖅᑎᑕᐅᔪᖅ ᐃᒪᕐᒥᐅᑕᓕᕆᔨᒃᑯᓐᓄᑦ ᑲᓇᑕᒥ ᐊᒻᒪ ᐱᔨᑦᑎᖅᑕᐅᓪᓗᑎ ᑕᐅᕼᐅᓯ ᓯᓚᑦᑐᓴᕐᕕᒃᔪᐊᖅ ᐱᓕᕆᖃᑎᖃᖅᑐᑎᑦ ᒐᕙᒪᖓᑦ ᓄᓇᕗᑦ. ᐃᒪᐅᑉ ᑭᓪᓕᖓ ᐅᑎᖅᑎᑕᐅᓂᖓᓄᑦ ᓄᓇᕗᒻᒥ ᐊᒻᒪ ᑭᓕᐅ ᓰᔅ ᖁᔭᓐᓇᒦᖅᑕᕗᑦ ᐊᒥᓱᑦ ᐃᓄᐃᑦ ᖃᐅᔨᒪᔭᖏᓐᓂ ᑎᒍᒥᐊᖅᑎᐅᔪᑦ ᐊᒻᒪ ᓴᓇᖑᐊᖅᑏᑦ ᐱ)ᕕᔅᓴᖃᕈᓐᓇᓚᐅᖅᑐᑦ ᐊᒻᒪ ᐊᔪᖏᓐᓂᖏᓐᓄᑦ ᐱᓕᕆᐊᒧᑦ.

ᐃᒪᐃᓐᓇᐅᖃᑦᑕᑎᓪᓗᒍ ᖁᕕᐊᓇᖃᑦᑕᖅᑐᖅ ᓄᓇᕗᒻᒥ, ᐃᒪᕐᒨᐸᓪᓕᐊᓂᖏᑦ ᐅᑎᖅᑕᖃᑦᑕᖅᑐᑦ ᐃᖃᓗᐃᑦ ᐊᒻᒪ ᐊᒥᓱᑦ ᐃᒪᒃᒥᐅᑕᐃᑦ ᐆᒪᔪᐃᑦ, ᓲᕐᒃᓗ ᕿᓚᓗᒐᐃᑦ, ᐊᕐᕖᑦ ᐊᒻᒪ ᑑᒑᓖᑦ. ᐊᐃᕖᑦ ᖃᑭᓯᒪᒐᔪᑦᑐᑦ ᕿᑭᖅᑕᓂᑦ ᐊᒻᒪ ᐃᒃᑲᑦᑐᓂ ᓄᓇᖅᐸᓯᒻᒥ ᐅᓐᓄᐊᒃᑯᑦ ᓯᕿᓐᓂᑎᓪᓗᒍ, ᓇᑦᑏᑦ ᓂᕆᖃᑦᑕᖅᑐᑎ ᐃᒪᐃᓐᓇᕐᒥ. ᐊᒥᓱᓄᑦ ᓄᓇᕗᒻᒥᐅᓄᑦ, ᐃᒪᐃᓐᓇᐅᑎᓪᓗᒍ ᑐᑭᖃᖅᑐᖅ ᐅᓪᓗᐃᑦ ᑕᑭᔫᑎᐅᓪᓗᑎ ᑭᓯᐊᓂ ᕿᓚᒥᐅᓪᓗᑎ ᐃᖃᓗᒐᓱᐊᖅᑐᓂ, ᐊᖑᓇᓱᐊᖅᑐᓂ, ᐊᒻᒨᒪᔪᑕᖅᑐᓂ, ᓄᓂᕙᑦᑐᓂ ᐊᒻᒪ ᐅᒥᐊᕐᑐᖅᑐᓂ ᐃᕝᕕᑦ ᐃᓚᖏᓐᓂ ᐊᒻᒪ ᐱᖃᓐᓇᖏᓐᓂ.

ᓯᑯᖃᖏᑦᑐᖅ ᐃᒪᖅ ᑐᑭᖃᕐᒥᔪᖅ ᐊᒥᓱᕈᕆᐊᖅᓯᒪᔪᑦ ᐃᒪᒃᑯᑦ ᐃᖏᕋᓂᐅᔪᑦ, ᐃᓚᖏᑦ ᓂᕆᐅᒋᔭᐅᓪᓗᑎ ᐊᒻᒪ ᐊᓯᖏᑦ ᐋᒡᒐ. ᐅᒥᐊᕐᔪᐊᑰᖅᑎᑦᑎᔪᑦ ᐅᒥᐊᕐᔪᐊᑦ ᓇᔅᓴᐸᑦᑐᑦ ᐱᔭᐅᔭᕆᐊᖃᓪᓚᕆᑐᓂ ᓱᓇᒃᑯᑖᓂ ᓄᓇᕗᒻᒥ ᓄᓇᓕᓐᓄᑦ, ᐊᑕᖏᖅᑐᒋᑦ 25 ᒫᓐᓇᐅᔪᒥᑦ ᐅᐸᒐᔅᓴᐅᔪᑦ ᖃᖓᑕᓲᖏᓐᓇᒃᑯᑦ (ᐅᕝᕙᓘᓐᓃᑦ ᖃᒧᑕᐅᔭᒃᑯᑦ) ᐅᑭᐅᑕᖅᑐᖅ ᐅᑭᐅᖑᑎᓪᓗᒍ. ᐳᓚᕋᖅᑎᓄᑦ ᐅᒥᐊᕐᔪᐊᑦ, ᐅᓯᖃᑦᑕᖅᑐᑦ, ᐅᖅᓱᐊᓗᑦᑕᐅᑏᑦ ᐅᒥᐊᕐᔪᐊᑦ, ᑎᖏᕐᕋᑕᓖᑦ ᐅᒥᐊᑦ ᐊᒻᒪ ᐅᒥᐊᖅᑐᑐᐃᓐᓇᓂᕐᒧᑦ ᐅᒥᐊᑦ ᑕᑯᔭᐅᕙᑦᑐᑦ ᐃᓗᐊᓂ ᐊᒻᒪ ᖃᓂᒋᔭᖓᓂ ᓄᓇᕗᑦ ᐱᒋᐊᕐᓂᖏᓐᓂ ᔫᓂ ᐊᒻᒪ ᓄᖑᖏᓐᓄᑦ ᓅᕕᐱᕆ. ᑮᓇᐅᔭᓕᐅᕋᓱᓐᓂᖅ ᓄᓇᖅᐸᓯᒻᒥ ᐊᒻᒪ ᐃᒪᐃᓐᓇᕐᒥ ᐃᖃᓗᒐᓱᐊᖅᑐᑦ ᐅᒥᐊᕐᔪᐊᑦ, ᐊᒻᒪᓗᑦᑕᐅᖅ ᒐᕙᒪᒃᑯᑦ ᐅᒥᐊᕐᔪᐊᖏᑦ ᓲᕐᓗ ᓯᑯᓯᐅᑎᑦ ᐊᒻᒪ ᓯᑯᓯᐅᑎᒃᑯᑦ ᐅᒥᐊᕐᔪᐊᖏᑦ, ᐃᓚᒋᔭᐅᒐᔪᑦᑐᑦ ᐅᐊᓐᓇᖓᓂ 60. ᑖᒃᑯᐊ ᐅᒥᐊᕐᔪᐊᑦ “ᐃᑲᔪᖃᑦᑕᖅᑐᑦ ᓄᓇᓕᒻᒥ ᓱᓇᒃᑯᑖᒃᑳᑲᓐᓂᖅᑐᑎᑦ (ᓂᑮᑦ, ᐅᖅᓱᐊᓗᐃᑦ, ᐊᒻᒪ ᓂᐅᕕᐊᔅᓴᐃᑦ ᑭᓱᑐᐃᓐᓇᐃᑦ), ᐃᓪᓗᓕᐅᓂᕐᒧᑦ (ᓄᓇᓕᒻᒧᑦ ᐊᐅᓚᑕᐅᔪᑦ ᐊᒻᒪ ᐅᔭᕋᓐᓂᐊᕐᕖᑦ), ᓄᓇᓕᒻᒧᑦ ᑮᓇᐅᔭᓕᕆᓂᕐᒧᑦ ᐱᓕᕆᔭᐅᔪᑦ (ᐳᓚᕋᖅᑐᓕᕆᓂᖅ, ᐅᔭᕋᓐᓂᐊᕐᓂᖅ, ᐃᖃᓗᒐᓱᐊᕐᓂᖅ), ᐊᒻᒪ ᐱᖅᑯᓯᓄᑦ ᐃᓅᓇᓱᐊᕐᓂᐅᔪᑦ (ᐱᖅᑯᓯᓅᖓᔪᑦ ᐱᓕᕆᔭᐅᔪᑦ ᐊᒻᒪ [ᒥᑭᔪᓂ] ᐊᖑᓇᓱᐊᓂᕐᒥᑦ).” ¹ 

ᓯᑯᖃᖏᓂᖅᓴᐅᓕᖅᑎᓪᓗᒍ ᐊᑯᓂᐅᑎᑦᑎᒋᐊᖅᑐᖅ ᐃᒪᐅᖏᓐᓇᖅᑐᒥᑦ ᐊᒻᒪ ᐊᒥᓲᓂᖅᓴᐃᑦ ᐅᒥᐊᕐᔪᐊᑦ ᐅᑭᐅᑕᖅᑐᒧᑦ ᑐᕌᖅᐸᑦᑐᑦ, ᐊᒥᓱᑦ ᓄᓇᓖᑦ ᐃᓱᒫᓘᑎᖃᖅᑐᑦ ᐊᑦᑐᖅᑕᐅᔪᓂᑦ ᖃᓄᐃᓕᓯᒪᖏᑦᑐᓂᑦ, ᐱᓕᕆᓂᖃᑦᑎᐊᖅᑐᓂ ᐃᒪᖏᓐᓂ. ᓄᓇᕗᒻᒥᐅᑕᐃᑦ ᑐᓴᕐᕕᖃᒃᑲᓐᓂᕈᒪᔪᑦ ᐅᒥᐊᕐᔪᓄᑦ ᐱᓕᕆᔭᐅᔪᓄᑦ ᐊᒻᒪ ᒪᓕᑦᑕᐅᔭᕆᐊᓐᓂᑦ ᓄᓇᕗᒻᒥ ᓇᔪᖅᑕᐅᔪᒥᑦ ᐊᒻᒪ ᐊᑦᑐᐊᓂᓖᑦ ᐃᒪᒃᑯᑦ ᑭᓪᓕᖓ. ᐅᑯᐊ ᐅᓂᒃᑳᑦ ᓄᓇᖑᐊᖅ ᓇᓗᓇᐃᔭᐃᓂᖃᖅᑎᑦᑎᔪᑦ ᒫᓐᓇᐅᔪᒥᑦ ᐊᐅᓚᑦᑎᓂᕐᒧᑦ ᓴᓇᓯᒪᓂᖓᓂ ᐅᑭᐅᑕᖅᑐᒥ ᐅᒥᐊᕐᔪᐊᓕᕆᓂᕐᒧᑦ ᐊᒻᒪ ᑐᓂᓯᖃᑦᑕᖅᑐᑦ ᐃᓚᖏᓐᓂ ᖃᓄᑐᐃᓐᓇᖅ ᐊᔾᔨᒌᖏᑦᑐᓂᑦ ᐅᒥᐊᕐᔪᐊᑦ ᐊᐅᓚᑕᐅᓂᖏᓐᓄᑦ ᑲᓇᑕᒥ ᐅᑭᐅᑕᖅᑐᖓᓂ.

ᑲᓇᑕᒥ ᓯᑯᓯᐅᑎᒃᑯᑦ ᑐᑭᒧᐊᖅᑎᑦᑎᔨᐅᔪᖅᑎᒥᐅᓪᓗᓂ ᑲᒪᒋᔭᖃᖅᑐᑦ ᐅᖅᓱᐊᓗᓐᓂᑦ ᑯᕕᔪᖃᖅᑐᓄᑦ ᖃᓄᐃᓕᓯᒋᐊᕐᓂᕐᒥ ᐊᒻᒪ ᐸᕐᓇᓯᒪᓂᕐᒧᑦ ᐅᑭᐅᑕᖅᑐᒥ. ᑐᐊᕕᕐᓇᖅᑐᓄᑦ ᐸᕐᓇᐃᓂᖅᐊᒻᒪ ᐊᑦᑕᓇᕈᑎᐅᔪᓐᓇᖅᑐᓂ ᐊᐅᓚᑦᑎᓂᕐᒧᑦ, ᑭᓯᐊᓂᓕ, rᐱᑕᖃᕆᐊᖃᖅᑐᖅ ᐃᖅᑲᓇᐃᔭᖃᑎᒌᒌᓪᓗᑎ ᓄᓇᓕᐅᔪᖅ (ᕼᐊᒻᒪᓚᒃᑯᑦ),ᓄᓇᕗᒻᒧ ᐊᒻᒪ ᒐᕙᒪᑐᖃᒃᑯᓐᓄᑦ ᑭᒡᒐᖅᑐᐃᔩᑦ. ² 

ᒫᓐᓇᐅᔪᒥᓪᓕ, ᓄᓇᓖᑦ ᐃᒪᐃᒍᓐᓇᖅᑐᑦ:

• ᐃᑲᔪᖅᑐᐃᓗᑎ ᐅᒥᐊᕐᔪᐊᒥ ᐅᑭᐅᑕᖅᑐᒥ ᑯᕕᔪᖃᖅᑐᓄᑦ ᖃᓄᐃᓕᓯᒋᐊᓂᕐᒧᑦ ᐸᕐᓴᐅᑦ ᐃᑭᒪᔪᓂᑦ ᐊᑕᖏᖅᑐᒋᑦ ᑮᓇᐅᔭᓕᐅᕋᓱᐊᓂᕐᒧᑦ ᐅᒥᐊᕐᔪᐊᓂᑦ ᐃᖏᕋᕕᒋᔭᖓᒍ ᐊᕕᑦᑐᖅᓯᒪᔪᒥᑦ
• ᓄᓇᖑᐊᑦ ᐊᒻᒪ/ᐅᕝᕙᓘᓐᓃᑦ ᑎᑎᕋᖅᓯᒪᔪᑦ ᐊᑐᐃᓐᓇᐅᔪᑦ ᖃᓄᐃᓕᓯᒋᐊᓂᕐᒧᑦ ᓇᓖᕌᕋᔅᓴᐃᑦ ᐊᒻᒪ ᐅᒥᐊᕐᔪᐊᑦ
• ᓴᖅᑭᑎᑦᑎᓗᑎ ᓄᓇᓕᒻᒧ ᐅᖅᓱᐊᓗᓐᓄᑦ ᓱᕈᖅᑐᓄᑦ ᑐᐊᕕᕐᓇᖅᑐᓄᑦ ᐸᕐᓇᐅᑦ

ᒫᓐᓇᐅᔪᒥᑦ, ᐅᖅᓱᐊᓗᓪᓗᐊᑕᐅ>ᑦᑐᑦ ᐅᓯᔭᐅᖃᑦᑕᖅᑐᑦ ᐅᑭᐅᑕᖅᑐᒥ ᐃᒪᒃᑯᕈᑎᑦ ᐅᖅᓱᐊᓗᐃᑦ, ᒑᓴᓖ ᐊᒻᒪ ᖃᖓᑕᓲᓄᑦ ᐅᖅᓱᐊᓗᐃᑦ, ᐊᑕᖏᖅᑐᑎ ᐱᑕᖃᐃᓐᓇᕈᓐᓇᖏᑦᑐᑦ ᐅᖅᓱᐊᓗᐃᑦ (ᐱᑕᖃᐃᓐᓇᕈᓐᓇᖏᑦᑐᑦ ᐅᖅᓱᐊᓗᐃᑦ ᓯᓚᒧᑦ ᐊᓂᕐᓂᖃᕐᕕᒻᒧᑦ ᓄᖑᖃᑦᑕᖅᑐᑦ ᐃᓗᐊᓂ 1-2 ᐅᓪᓗᐃᑦ ᐊᒻᒪ ᐅᖅᓱᐊᓗᒥᓂᖅᑕᖃᕈᓐᓇᖏᑦᑐᖅ ᓯᓚᒧᑦ ᓗᖑᓚᐅᖅᑎᓪᓗᒍ). ᓴᓗᒻᒪᓴᖅᓯᒪᖏᑦᑐᑦ ᐅᖅᓱᐊᓗᐃᑦ ᐃᖏᕋᑎᑕᐅᕙᖏᑦᑐᑦ ᐅᓯᔭᐅᓪᓗᑎ ᐅᑭᐅᑕᖅᑐᒥ.

ᐱᔾᔪᑎᒋᓗᒍ ᐊᐅᓚᔪᖃᖏᓐᓂᖓᓄᑦ ᐃᑎᔪᒥ ᑐᓚᑦᑕᕕᒻᒥᑦ ᕗᓇᕗᒻᒥ ᓄᓇᓕᓐᓂᑦ ᐅᓪᓗᒥᒧᑦ ᑎᑭᑦᑐᒍ, ᐅᖅᓱᐊᓗᐃᑦ ᐊᐅᓪᓛᖅᑎᑕᐅᕙᑦᑐᑦ ᐅᖅᓱᐊᓗᑦᑕᐅᑎᓄᑦ ᓄᓇᒦᑦᑐᓄᑦ ᐅᖅᓱᐊᓗᖃᐅᑎᓄᑦ ᐳᑦᑕᔪᒃᑯᑦ ᓱᓪᓗᓕᒃᑯᑦ ᐅᕝᕙᓘᓐᓃᑦ ᐅᓯᖃᖅᑕᐅᑎᓄᑦ. ᐅᓯᖃᖅᑕᐅᑏᑦ ᓄᓇᒨᖅᑕᐅᓪᓗᑎ ᐊᐅᓪᓛᑎᑦᑎᓪᓗᒋᑦ ᐅᖅᓱᐊᓗᒻᒥᑦ ᓄᓇᒧᑦ ᐅᖅᓱᖃᐅᑎᓄᑦ ᐊᒻᒪ ᐅᖅᓱᖃᐅᑎᒃᑯᕕᓐᓄᑦ.

ᑲᓇᑕᒥ, ᐊᒥᓲᓂᖅᓴᐃᑦ ᐅᒥᐊᕐᔪᐊᓄᑦ ᐅᖅᓱᐊᓗᐃᑦ ᑯᕕᔭᐅᔪᑦ ᐅᖅᓱᐊᓗᖏᓐᓂ, ᐅᓯᖏᑕᖏᓐᓂᐅᖏᑦᑐᖅ ᐅᖅᓱᐊᓗᓐᓂ. ³  ᐃᖏᕐᕋᑎᓪᓗᒋᑦ ᐅᒥᐊᕐᔪᐊᑦ ᐅᕐᓱᐊᓗᖕᒥ ᐊᑐᕐᔪᐊᑐᐃᓐᓇᕆᐊᖃᕐᒪᑕ ᐅᖁᒪᐃᓐᓂᕐᓴᓂᒃ, ᐅᕐᓱᐊᓗᑐᐃᓐᓇᕐᓂᒃ, ᐃᒪᒃᑯᑦ ᐊᑐᖅᑕᐅᔪᓂᒃ ᑏᓱᓂᒃ ᐊᒻᒪ/ᐅᕝᕙᓘᓐᓃᑦ ᐅᒥᐊᓄᑦ ᒑᓴᓖᒥ. ⁴ 

ᐊᐳᕈᑎᐅᔪᑦ ᑲᔪᓯᑦᑎᐊᕐᓂᖃᖅᑐᒧᑦ ᑐᐊᕕᕐᓇᖅᑐᓄᑦ ᖃᓄᐃᓕᓯᒋᐊᓂᕐᒧᑦ ⁵ 

• ᑐᓴᐅᒪᔾᔪᑎᓕᕆᓂᕐᒧᑦ
• ᐅᑭᐅᑕᖅᑐᖅ ᐊᕙᑎᖓ/ᓯᓚᖓ
• ᓈᒻᒪᖏᑦᑐᑦ ᓱᓇᒃᑯᑖᑦ/ᒪᑭᒪᑎᑕᐅᓂᖏᑦ
• ᐱᔭᔅᓴᐅᓂᖏᑦ/ᐃᖏᕋᑎᑕᐅᓂᖏᑦ ᑯᕕᔪᖃᕐᕕᐅᔪᒧᑦ
• ᑐᖅᑯᐃᓂᖅ ᐊᒻᒪ ᐃᒋᑦᑎᓂᖅ

ᐱᕕᔅᓴᐅᔪᓐᓇᖅᑐᑦ ᑲᔪᓯᓂᖃᑦᑎᐊᖅᑐᒥ ᑐᐊᕕᕐᓇᖅᑐᒥᑦ ᖃᓄᐃᓕᓯᒋᐊᓂᕐᒧᑦ 2021−ᒥ, ᑎᓴᒪᐅᔪᖅᑐᑦ ᐊᑕᖏᖅᑐᑎ ᑲᓇᑕᒥ ᓯᑯᓯᐅᑎᒃᑯᑦ (CCG) ᐅᒥᐊᕐᔪᐊᖏᑦ ᐅᐊᑦᑎᓚᐅᖅᑐᑦ ᐅᑭᐅᑕᖅᑐᒥᑦ. ⁶  ᐊᑕᖏᖅᑐᑎ ᑲᓇᑕᒥ ᓯᑯᓯᐅᑎᒃᑯᑦ ᓯᑯᓯᐅᑎᖏᑦ ᐃᖅᑲᓇᐃᔭᖅᑐᑦ ᓄᓇᕗᒻᒥ ᐊᒻᒪ ᐊᑦᑐᐊᓂᓕᓐᓄᑦ ᐃᒪᖏᓐᓂ ᓱᓇᒃᑯᑖᖃᖅᑐᑎ ᐊᒻᒪ ᐊᑐᐃᓐᓇᐅᔪᑦ ᐱᓕᕆᐸᖃᕐᓗᑎ ᑐᐊᕕᕐᓇᖅᑐᓂᑦ, ᐱᖃᓯᐅᑎᓪᓗᑎ ᐃᒪᕐᒥ ᓱᕈᐃᓂᐅᔪᓂᑦ ᖃᓄᐃᓕᓂᐅᔪᓂᑦ.

ᑲᔪᓯᓂᖃᑦᑎᐊᖅᑐᖅ ᑐᐊᕕᕐᓇᖅᑐᒥ ᖃᓄᐃᓕᓯᒋᐊᓂᕐᒧᑦ ᑐᓐᖓᓂᖃᓂᐊᖅᑐᖅ ᑐᓴᐅᒪᔾᔪᑎᓕᕆᑦᑎᐊᓂᕐᒧᑦ ᐊᒻᒪ ᓇᒦᓐᓂᖓ ᐅᐸᒐᔅᓴᐅᓂᖓ. ᐊᕕᑦᑐᖅᓯᒪᔪᓂᑦ ᐃᒪᖏᑦ ᐅᑭᐅᑕᖅᑐᒥ ᕿᑭᖅᑕᒐᓚᖏᓐᓂ, ᑕᓯᐅᔭᖅᔪᐊᖅ, ᔭᐃᒻᔅ ᐸᐃ ᐊᒻᒪ ᐅᖓᕙ ᐃᒪᖓ, ᒐᕙᒪᑐᖃᒃᑯᑦ ᖃᓄᐃᓕᓯᒋᐊᕐᓂᖏᑦ ᓈᒻᒪᖏᑐᐃᓐᓇᕆᐊᖃᖅᑐᑦ. ᐱᓕᕆᐊᓗᒍ ᑖᓐᓇ ᐱᑕᖃᓪᓚᕆᑦᑐᖅ, ᑲᓇᑕᒥ ᓯᑯᓯᐅᑎᒃᑯᑦ ᓴᖓᑎᑦᑎᒋᐊᖅᑐᑦ ᓄᓇᓕᒻᒧᑦ ᐱᓕᕆᔪᓐᓇᕐᓂᖓ ᖃᓄᐃᓕᓯᒋᐊᓂᕐᒧᑦ ᑐᐊᕕᕐᓇᖅᑐᓂᑦ ᐊᒻᒪ ᓱᕈᓐᓇᖅᑐᓂᑦ ᖃᓄᐃᓕᓂᐅᔪᓄᑦ ᓄᓇᕗᓕᒫᒥ.

ᓯᑯᓯᐅᑎᒃᑯᑦ ᑲᓇᑕᒥ ᐃᑲᔪᖅᑎᖏᑦ ᓄᓇᓕᒻᒥ ᐃᑲᔪᑐᐃᓐᓇᖃᑦᑕᖅᑐᑦ ᓇᒻᒥᓂᖅ ᐅᒥᐊᖏᓐᓂ ᐊᑐᖃᑦᑕᖅᑐᑦ ᖃᓄᐃᓕᓯᒋᒋᐊᕐᓗᑎ ᐃᒪᐃᓐᓇᕐᒥ ᑐᐊᕕᕐᓇᖅᑐᓂᑦ ᐊᒻᒪ ᐃᒪᕐᒥ ᐸᖅᓴᐃᓂᕐᒧᑦ. ⁷  ᐃᓕᓐᓂᐊᖅᑎᑕᐅᕙᑦᑐᑦ ᐊᒻᒪ ᓱᓇᒃᑯᑖᖅᑖᖅᑎᑕᐅᓪᓗᑎ ᓯᑯᓯᐅᑎᒃᑯᓐᓂ ᑲᓇᑕᒥ. ᓄᓇᖅᐸᓯᒻᒥ ᑐᒥᐊᕕᕐᓇᖅᑐᓄᑦ ᐅᒥᐊᒃᑯᕕᒃ ᓱᓇᒃᑯᑖᖃᖅᑎᑕᐅᔪᖅ ᑎᓴᒪᐅᔪᓐᖏᒑᖅᑐᓂᑦ ᐅᕝᕙᓘᓐᓃᑦ ᑎᓴᒪᐅᔪᖅᑐᓂᑦ ᒦᑕᓂᑦ ᓱᑲᑦᑐᓂᑦ ᐅᒥᐊᕐᓂᑦ ᐃᖏᕋᓂᖃᕈᓐᓇᖅᑐᑦ ᐅᖓᑖᓄ 24 ᐃᒪᒃᑯᑦ ᓱᑲᓐᓂᖓ. ⁸ 

ᑐᓴᖅᑎᑦᑎᓂᖅ ᐃᒪᕐᒥ ᑯᕕᔪᖃᖅᑐᓂᑦ (ᒐᕙᒪᑐᖃᒃᑯᑦ) ᕿᑎᕐᒥᐅᓂ ᐊᒻᒪᓗ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᑦ ᐊᑭᖃᖏᑦᑐᖅ ᐅᖄᓚᐅᑎᖓ: 1-800-265-0237 (24 ᐃᑲᕋᐃᑦ) ᐊᕕᑦᒃᑐᖅᓯᒪᔪᓕᒫᓂᑦ, ᐃᒪᕐᒥ ᓱᕈᐃᔪᓂᑦ ᖃᓄᐃᓕᓂᐅᔪᑦ ᑐᓴᖅᑎᑦᑎᒍᑕᐅᒍᓐᓇᖅᑐᑦ ᖃᐅᔨᒋᐊᕐᕕᖃᕐᓗᑎ ᐃᒪᒃᑯᑦ ᑐᓴᐅᒪᔾᔪᑎᓕᕆᓂᕐᒧᑦ ᐊᒻᒪ ᐃᖏᕋᖃᑦᑕᖅᑐᓄᑦ ᐱᔨᑦᑎᖅᑐᑦ (MCTS) ᐊᓪᓚᕕᖓ ᐆᕚᕈᑎᒃᑯᑦ ᓈᓴᐅᑎᖓ 16. ᓇᒦᓐᓂᐅᔪᓄᑦ ᐱᖃᓯᐅᔾᔨᖏᑦᑐᑦ ᐆᕚᕈᑎᒃᑯᑦ ᓈᓴᐅᑎᖓ 16, ᓲᕐᓗ ᖁᑦᑎᑦᑐᒥ ᐅᑭᐅᑕᖅᑐᒥ, ᖃᓄᐃᓕᓂᐅᔪᑦ ᑐᓴᖅᑎᑦᑎᒍᑕᐅᔪᓐᓇᖅᑐᑦ ᐆᕚᕈᑎᕋᓛᒃᑯᑦ MF (ᕿᑎᕋᖅᑐᖅ ᐅᖓᓯᓐᓂᖓ) ᐊᒻᒪ HF (ᖁᕝᕙᓯᑦᑐᑦ ᐅᖓᓯᓐᓂᖓ) ᑐᓴᐅᒪᔾᔪᑎᓕᕆᔾᔪᓂ.

ᑐᓴᖅᑎᑦᑎᓂᖅ ᐃᒪᐅᑉ ᑭᓪᓕᖓᓂ ᑯᕕᔪᖃᖅᑐᓂᑦ (ᓄᓇᕗᒻᒧ) ᖃᐅᔨᓐᓂᕈᕕᑦ ᐅᖅᓱᐊᓗᑦᑕᖃᑦᑕᖅᑐᒥᑦ ᐅᕝᕙᓘᓐᓃᑦ ᐊᓯᖏᓐᓂ ᓱᕈᓐᓇᖅᑐᓕᓐᓂ ᑯᕕᔪᖃᖅᑐᓂᑦ, ᑐᓴᖅᑎᑦᑎᒍᑎᒋᓗᒍ ᐅᕗᖓ 24-ᐃᑲᕋᐃᑦ ᑯᕕᔪᖃᖅᑐᓄᑦ ᐅᖄᓚᕕᒃ.

ᑲᒪᒋᓪᓗᒍ ᑯᕕᓐᓂᕈᕕᐅᒃ ᐅᖓᑖᓃᑦᑐᑦ 100 ᓖᑕᐃᑦ ᐅᖅᓱᐊᓗᒻᒥᑦ, ᐅᕝᕙᓘᓐᓃᑦ ᖃᐅᔨᒪᖏᒃᑯᕕᑦ ᖃᓄᑎᒋ ᐊᖏᔪᒥᑦ ᑯᕕᔪᖃᖅᑐᒥᑦ, ᒪᓕᒐᖅᑎᒍᑦ ᑐᓴᖅᑎᑦᑎᒍᑎᒋᐊᖃᖅᑕᐃᑦ. ⁹  ᑐᓴᖅᑎᑦᑎᓗᓂ ᑯᕕᔪᖃᖅᑐᓂᑦ, ᐅᖄᓚᓗᑎ 867-920-8130, 24 ᐃᑲᕋᐃᑦ ᐅᓪᓗᓕᒫᖅ. ᐱᔭᕇᖅᓯᔪᓐᓇᕐᒥᔪᑎᑦ ᑕᑕᑎᕆᐊᓕᒃ ᐊᑐᐃᓐᓇᐅᔪᖅ ᒪᑉᐱᒐᖓᓂ 24 ᐅᑯᓇᓂ ᐅᖃᓕᒫᒐᐃᑦ ᐊᑐᐊᒐᐃᑦ (ᐃᓚᓕᐅᔾᔭᐅᓯᒪᔪᖅ 1) ᐅᕝᕙᓘᓐᓃᑦ ᐅᕙᓂ https://www.gov.nu.ca/iu/avatilirijikkut/documents/kuvijunut-salummaqsainirmut ᓱᑲᔪᒃᑰᑎᓪᓗᒍ ᐱᔭᕇᖅᓯᒪᔪᖅ ᑕᑕᑎᕆᐊᓕᒃ ᐅᕗᖓ 867-873-6924 ᐅᕝᕙᓘᓐᓃᑦ ᖃᕋᓴᐅᔭᒃᑯᑦ spills@gov.nu.ca ᐃᓚᒋᐊᕐᓗᒍ, ᖃᐅᔨᒋᐊᕐᕕᒋᔪᓐᓇᖅᑕᐃᑦ ᐆᒪᔪᕐᓂᐊᖅᑎ ᓄᓇᓕᒋᔭᕐᓂᑦ ᐃᑲᔪᖅᑕᐅᔪᒪᓗᑎ.

ᑲᓇᑕᐅᑉ ᓯᒡᔭᖏᓐᓂᒃ ᓴᐳᓐᓂᐊᖅᑎᑦ (CCG) ᐱᓕᕆᔨᒻᒪᕆᒋᔭᐅᔪᑦ ᑲᒪᒋᔭᖃᖅᖢᑎᒃ ᐅᒥᐊᒃᑯᑦ ᑐᐊᕕᕐᓇᖅᑐᓕᕆᓂᕐᒥᒃ (SAR) ᐊᒻᒪᓗ ᑕᕆᐅᕐᒥ ᖃᓄᐃᓕᐅᕈᑎᐅᔭᑦᑐᓄᑦ, ᐃᑲᔪᖅᑕᐅᓯᒪᓪᓗᑎᒃ ᑲᓇᑕᒥ ᓴᐳᓐᓂᐊᖅᑎᒃᑯᓐᓂᒃ (DND) ᐊᒻᒪᓗ ᐃᑲᔪᖃᑦᑕᖅᑐᓂᒃ ᓯᒡᔭᓂᒃ ᓴᐳᓐᓂᐊᖅᑎᓄᑦ ᐃᑲᔪᖅᑎᓂᒃ. ¹⁰ 

ᓄᓇᕗᒻᒥ ᐃᒪᕐᒥ ᑐᓴᐅᒪᔾᔪᑎᓕᕆᓂᕐᒧᑦ ᐊᒻᒪ ᐃᖏᕋᖃᑦᑕᖅᑐᓄᑦ ᐱᔨᑦᑎᖅᑕᑦ (MCTS) ᐊᓪᓚᕕᖓ, ᐃᖃᓗᓐᓃᑦᑐᑦ, “ᖃᐅᔨᓴᖃᑦᑕᖅᑐᑦ ᐅᑭᐅᑕᖅᑐᒥ ᐅᒥᐊᕐᔪᓕᕆᓂᓕᒫᖓᔪᓂᑦ, ᐱᖃᑦᑕᖅᑐᑦ ᐃᒪᒃᑯᑦ ᑐᓴᐅᒪᔾᔪᑎᓂᑦ, (ᐱᖃᓯᐅᑎᓪᓗᑎ ᑐᐊᕕᕐᓇᖅᑐᒥᑦ ᐅᖃᓚᔪᑦ), ᐊᒻᒪ ᖃᐅᔨᑎᑕᐃᓐᓇᕆᔭᕆᐊᖃᖅᑕᖏᑦ ᑲᒪᒋᔭᖃᖅᑐᑦ ᑎᒥᐅᔪᑦ ᐃᒪᕐᒥᑦ ᐱᓂᕐᓗᑦᑐᖃᖅᑐᒥᓂᐅᑎᓪᓗᒍ.” ¹¹ 

ᑐᐊᕕᕐᓇᖅᑐᒥᑦ ᖃᓄᐃᑦᑐᖃᖅᑎᓪᓗᒍ, ᐃᒪᕐᒥ ᑐᓴᐅᒪᔾᔪᑎᓕᕆᓂᕐᒧᑦ ᐊᒻᒪ ᐃᖏᕋᖃᑦᑕᖅᑐᓄᑦ ᐱᔨᑦᑎᖅᑏᑦ ᒪᓕᖃᑦᑕᖅᑐᑦ ᐱᑦᑎᐊᖅᓯᒪᔪᓂᑦ ᑐᓴᐅᒪᔾᔪᑎᓕᕆᓂᕐᒧᑦ ᐸᕐᓇᐅᒻᒥᑦ.

ᐊᐱᕆᔭᐅᑎᓪᓗᒋᑦ ᓄᓇᓕᒻᒧᑦ ᐃᒪᕐᒥ ᑐᓴᐅᒪᔾᔪᑎᓕᕆᓂᕐᒧᑦ ᐊᒻᒪ ᐃᖏᕋᖃᑦᑕᖅᑐᓄᑦ ᐱᔨᑦᑎᖅᑏᑦ ᖃᐅᔨᒋᐊᕐᕕᖃᕋᔭᖅᑐᑦ, ᐃᒪᕐᒥ ᑐᓴᐅᒪᔾᔪᑎᓕᕆᓂᕐᒧᑦ ᐊᒻᒪ ᐃᖏᕋᖃᑦᑕᖅᑐᓄᑦ ᐱᔨᑦᑎᖅᑏᑦ ᓇᓗᓇᐃᖅᓯᒪᔭᖏᑦ ᐸᓖᓯᒃᑯᑦ, ᕼᐊᒻᒪᓚᒃᑯᑦ (ᐊᓪᓚᑦᑎ ᐊᒻᒪ/ᐅᕝᕙᓘᓐᓃᑦ ᒪᐃᔭ), ᐊᒻᒪ ᐆᒪᔪᕐᓂᐊᑎᒃᑯᑦ ᑲᑐᔾᔨᖃᑎᒌᖏᑦ (HTA).

ᓄᓇᓕᐅᔪᖅ ᑐᓴᖅᑎᑕᐅᒍᓂ ᑐᐊᕕᕐᓇᖅᑐᒥ ᖃᓄᐃᓐᓂᐅᔪᒥᑦ ᓯᕗᓂᐊᒍᑦ ᐃᒪᕐᒥ ᑐᓴᐅᒪᔾᔪᑎᓕᕆᓂᕐᒧᑦ ᐊᒻᒪ ᐃᖏᕋᖃᑦᑕᖅᑐᓄᑦ ᐱᔨᑦᑎᖅᑏᑦ, ᕼᐊᒻᒪᓚᒃᑯᑦ ᐊᒻᒪ/ᐆᕝᕙᓘᓐᓃᑦ ᐆᒪᔪᕐᓂᐊᑎᒃᑯᑦ ᑲᑐᔾᔨᖃᑎᒌᖏᑦ ᑲᒪᒋᔭᖃᖅᑐᖅ ᖃᐅᔨᒋᐊᕐᕕᖃᓂᕐᒧᑦ ᐱᔪᓐᓇᐅᑎᖃᖅᑐᓂᑦ.

ᒫᓐᓇᐅᔪᒥᓪᓕ, ᓄᓇᓖᑦ ᐃᒪᐃᒍᓐᓇᖅᑐᑦ:

• ᐃᑲᔪᕐᓗᑎ ᐊᒥᓱᕈᕆᐊᖅᑕᐅᓗᑎ ᐊᒥᓲᓂᖏᑦ ᓯᑯᓯᐅᑎᒃᑯᑦ ᑲᓇᑕᒥ ᐃᑲᔪᖅᑎᖏᑦ ᓄᓇᕗᒻᒥ
• ᑐᕌᒐᖃᕐᓗᑎ ᐊᕐᕌᒍᑕᒫᑦ ᐸᖅᓴᐃᔩᑦ ᐃᓕᓐᓂᐊᓂᕐᒧᑦ ᕼᐊᒻᒪᓚᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐊᒻᒪ ᐆᒪᔪᕐᓂᐊᑎᒃᑯᑦ ᑲᑐᔾᔨᖃᑎᒌᖏᑦ ᐃᓚᒋᒋᔭᐅᔪᑦ

ᑭᓴᖅᓯᒪᕕᐊᔪᖅ ᓈᒻᒪᑦᑐᑎᑦ ᑭᓴᕐᓗᒍ ᐅᒥᐊᕐᔪᐊᖅ. ᐱᔪᓇᐅᑎᖃᕐᓂᖅ ᑭᓴᓂᕐᒧᑦ ᐅᒥᐊᕐᔪᐊᒥᑦ ᐃᓚᒋᔭᖓ ᒪᓕᒐᕐᓂᑦ ᐱᔪᓐᓇᐅᑎᓂᑦ ᐃᖏᕋᕕᐅᔪᓂᑦ. ¹² 

ᐅᒥᐊᕐᔪᐊᑦ ᐃᓱᒪᐃᓐᓇᖅ ᑭᓴᖅᓯᒪᑲᐃᓐᓇᕈᓐᓇᖅᑐᑦ ᓇᒥᑐᐃᓐᓇᖅ ᐊᑦᑕᓇᖏᑦᑐᒥᑦ ᐊᒻᒪ ᓈᒻᒪᑦᑐᒥᑦ ᐊᑯᓂᐅᓂᖃᕐᓗᓂ ᓇᒥᑐᐃᓐᓇᖅ ᓈᒻᒪᑦᑐᓂᑦ ᓇᒦᓐᓂᕆᔭᖏᓐᓂ, ᑭᓯᐊᓂ ᓇᓗᓇᐃᖅᑕᐅᓯᒪᒍᓂ ᐱᔪᓐᓇᖅᑎᑕᐅᖏᓪᓗᓂ ᒪᓕᒐᖅᑎᒍᑦ ᐅᕝᕙᓘᓐᓃᑦ ᒪᓕᑦᑕᐅᔭᕆᐊᓖᑦ. ¹³  ᑭᓪᓕᒋᔭᖏᑦ “ᐊᑯᓂᐅᖏᑦᑐᖅ” ᐊᒻᒪ “ᓈᒻᒪᑦᑐᒥᑦ” ᓇᓗᓇᐃᖅᑕᐅᓯᒪᖏᑦᑐᑦ ᐅᕝᕙᓘᓐᓃᑦ ᑐᕌᒐᖃᖅᑎᑕᐅᖏᑦᑐᑦ ᐃᖏᕋᔪᓕᕆᔨᒃᑯᓐᓄᑦ ᑲᓇᑕᒥ.

ᑲᓇᑕᒥ ᐅᒥᐊᕐᔪᐊᓕᕆᓂᕐᒧᑦ ᐱᖁᔭᖅ, 2001 ᐊᒻᒪ ᒪᓕᑦᑕᐅᔭᕆᐊᓖᑦ ᐊᐅᓚᑦᑎᔪᑦ ᐅᒥᐊᕐᔪᐊᓂᑦ ᑭᓴᖅᓯᒪᔪᓂᑦ. ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᑖᒃᑯᓂᖓ ᐱᖁᔭᓂᒃ ᐊᑐᓕᖅᑎᑦᑎᓯᒪᔪᑦ.

ᑳᐱᑕᓐ ᐅᒥᐊᕐᔪᐊᒥ ᑲᒪᒋᔭᖃᖅᑐᖅ ᐅᑯᓂᖓ:

• ᓂᕈᐊᕐᓗᓂ ᐊᑦᑕᓇᖏᑦᑐᒥ ᑭᓴᖅᓯᒪᕕᒻᒥ
• ᐅᒥᐊᕐᔪᐊᖅ ᐊᑦᑕᓇᐃᖅᓯᒪᑎᑦᑏᓇᕐᓗᓂᐅᒃ ᖃᖓᒃᑯᓕᒫᖅ

ᐃᓗᐊᓂ ᑐᓚᕝᕕᒻᒧ ᑭᓪᓕᖓᓂ, ᑲᓇᑕᒥ ᑐᓚᑦᑕᕕᓐᓄᑦ ᐱᔪᓐᓇᐅᑎᓖᑦ ᑐᑭᒧᐊᖅᑎᑦᑎᔪᑦ ᐅᒥᐊᕐᔪᐊᓂᑦ ᓇᒧᑦ ᑭᓴᖅᓯᒪᒍᓐᓇᕐᓂᖏᓐᓄᑦ, ᐊᒻᒪ ᖃᓄᑎᒍ ᐊᑯᓂᐅᔪᒥᑦ, ᐃᓗᐊᓂ ᐱᔪᓐᓇᐅᑎᖃᕐᕕᖓᓂᑦ. ᒫᓐᓇᐅᔪᒥᑦ, ᑐᓚᑦᑕᕕᒻᒧᑦ ᐱᔪᓐᓇᐅᑎᓖᑦ ᐱᑕᖃᖏᑦᑐᖅ ᓄᓇᕗᒻᒥ. ᑕᐃᒪᐃᓐᓂᖓᓄᑦ, ᑲᓇᑕ ᐃᓕᓴᕆᔭᐅᓯᒪᔪᒥᑦ ᐱᕙᓪᓕᐊᓂᖃᖏᑦᑐᖅ ᓇᓗᓇᐃᕐᓗᒋᑦ ᑭᓴᖅᓯᒪᕕᐅᔪᓐᓇᖅᑐᑦ ᐊᒻᒪ ᑐᑭᒧᐊᖅᑎᓪᓗᒋᑦ ᖃᓄᐃᓘᖃᑦᑕᕐᓂᖏᑦ ᐅᒥᐊᕐᔪᐊᑦ ᑭᓴᖅᓯᒪᔪᑦ ᓯᓚᑖᓂ ᑐᓚᑦᑕᕕᒻᒧᑦ ᑭᓪᓕᖏᓐᓄᑦ ᓄᓇᕗᒻᒥ.

ᒫᓐᓇᐅᔪᒥᓪᓕ, ᓄᓇᓖᑦ ᐃᒪᐃᒍᓐᓇᖅᑐᑦ:

• ᓴᖅᑭᑎᑦᑎᓗᑎ ᐱᕙᓪᓕᐊᓂᖓᓄ ᓇᓗᓇᐃᖅᑕᐅᓗᓂ ᑭᓴᖅᓯᒪᕕᐅᔪᓐᓇᖅᑐᑦ ᓇᒦᓐᓂᖏᑦ
• ᖃᐅᔨᓴᕐᓗᑎ ᐊᒻᒪ ᖃᓄᐃᓕᓯᒋᐊᕐᓗᑎ ᐊᕙᑎᓕᕆᓂᕐᒧᑦ, ᑮᓇᐅᔭᓕᕆᓂᕐᒧᑦ ᐊᒻᒪ ᐱᖅᑯᓯᓄᑦ ᐃᓱᒫᓘᑕᐅᔪᓂᑦ ᐊᑦᒻᒪ ᐊᑦᑐᐃᓂᖃᖅᑐᑦ ᓄᓇᓕᒻᒥᐅᑕᐅᖏᑦᑐᑦ ᑭᓴᖅᓯᒪᓂᖏᑦ
• ᑎᑎᕋᕆᐊᓐᖓᖅᓯᓗᑎ ᐊᑐᐊᒐᕐᓂ ᐱᐅᓛᓂᑦ ᐊᑐᖅᑕᐅᓂᐊᖅᑐᓂᑦ ᐅᒥᐊᕐᔪᐊᓄᑦ ᑭᓴᕐᓗᑎ
• ᑐᔅᓯᕋᕐᓗᑎ ᑲᒪᒋᔭᖃᓂᕐᒧᑦ/ᐊᐅᓚᑦᑎᓂᕐᒧᑦ ᓇᓖᕌᕋᔅᓴᐃᑦ ᓄᓇᓕᒻᒥᐅᑕᐅᖏᑦᑐᑦ ᑭᓴᖅᓯᒪᓂᖏᓐᓄᑦ
• ᓇᓗᓇᐃᕐᓗᒋᒋᑦ ᖃᓄᐃᓐᓂᕆᔭᖏᑦ ᐃᓱᒪᒋᒋᔭᐅᔪᑦ ᑭᓴᖅᓯᒪᓗᓂ ᐊᑦᑕᓇᖅᑐᑦ ᐊᒻᒪ/ᐅᕝᕙᓘᓐᓃᑦ ᑭᓴᖅᓯᒪᑲᐃᓐᓇᓂᕐᒧᑦ

ᑭᓈᓗᐃᑦ ᑲᓇᑕᒥ ᐅᑭᐅᑕᖅᑐᒥ ᐅᒥᐊᕐᔪᐊᓕᕿᓂᕐᒧᑦ ᐊᑦᑕᓇᐃᖅᓯᒪᓂᕐᒧᑦ ᐊᒻᒪ ᓱᕈᖅᑎᑎᑦᑕᐃᓕᓂᕐᒧᑦ ᒪᓕᑦᑕᐅᔭᕆᐊᓖᑦ ᐱᔪᓐᓇᑎᑦᑎᖏᑦᑐᑦ ᑯᕕᑎᑦᑎᓗᑎ ᖃᓄᐃᑦᑐᑐᐃᓐᓇᕐᓂ ᐊᑦᑕᑯᓂᑦ ᐅᑭᐅᑕᖅᑐᒥ ᐃᒪᖏᓐᓄᑦ ᑭᓯᐊᓂ ᓴᓗᒻᒪᓴᖅᓯᒪᖏᑦᑐᑦ ᑭᓈᓗᐃᑦ. ᐱᖁᔭᖅ ᐊᑐᖅᑐᖅ ᐃᒪᖏᓐᓄᑦ ᐅᐊᓐᓇᖓᓂ 60 ᐊᒻᒪ ᑎᑭᑦᑐᒍ 200 ᐃᒪᒃᑯᑦ ᒪᐃᔪᔅ ᓄᓇᐅᑉ ᑭᓪᓕᖓᓂ. ᓴᓗᒻᒪᓴᖅᓯᒪᖏᑦᑐᑦ ᑭᓈᓗᐃᑦ ᑯᕕᑎᑕᐅᔪᓐᓇᖏᑦᑐᑦ ᐃᓗᐊᓂ 12 ᐃᒪᒃᑯᑦ ᒪᐃᔪᔅ ᓇᑭᑐᐃᓐᓇᖅ ᓯᑯᑕᓕᒻᒥ ᐅᕝᕙᓘᓐᓃᑦ ᓄᓇᒨᖓᔪᓂᑦ ᓯᑯᓂᑦ (ᓯᑯᖓ ᓄᓇᒨᖓᔪᖅ), ᓴᓗᒻᒪᓴᖅᓯᒪᔪᑦ ᑭᓈᓗᐃᑦ ᑯᕕᑎᑕᐅᔪᓐᓇᖏᑦᑐᑦ ᐃᓗᐊᓂ 3 ᐃᒪᒃᑯᑦ ᒪᐃᔪᔅ. ᑭᓈᓗᓐᓂᑦ ᑯᕕᑎᑦᑎᔪᖃᕆᐊᖃᖏᑦᑐᖅ ᓯᑯᖃᕈᓂ 10% ᐃᒪᐅᓂᖓᓂᑦ.

ᐊᓯᖏᑦ ᑯᕕᔭᐅᔪᑦ ᑕᑯᔅᓴᐅᓂᖅᓴᐃᑦ ᐃᒦᑦ ᑯᕕᑎᑕᐅᔪᑦ ᐃᓚᒋᔭᖓ ᐊᐅᓚᓂᕆᒐᔪᑦᑕᖏᓐᓄᑦ ᐊᒻᒪ ᐱᔪᓐᓇᖅᑎᑕᐅᔪᑦ, ᐱᖃᓯᐅᑎᓪᓗᑎ ᓂᓪᓕᒋᐊᖅᑎᑦᑎᓂᕐᒧᑦ ᐅᕝᕙᓘᓐᓂᑦ ᐊᑐᖅᑕᐅᑲᓐᓂᕐᓂᖏᓐᓄᑦ ᐃᒦᑦ (ᓲᕐᓗ ᐊᒥᖅ ᐊᑐᖅᑕᐅᔪᖅ ᓂᓪᓕᑎᒋᐊᕐᓗᒋᑦ ᐊᐅᓚᐅᑎᖏᑦ) ᐊᒻᒪ/ᐅᕝᕙᓘᓐᓃᑦ ᐃᒪᖃᕐᕕᖓᓃᑦᑐᑦ, ᓇᓪᓕᐊᑐᐃᓐᓇᖅ ᑭᖑᓪᓕᖅ ᐃᒥᐅᔪᑦ ᓄᐊᑦᑎᔪᑦ ᐃᒪᖃᕐᕕᖓᓃᑦᑐᑦ ᐅᒥᐊᕐᔪᐊᒥ. ᑯᕕᑎᑕᐅᔪᑦ ᐅᒥᐊᕐᔪᐊ ᖄᖓᓂ ᐊᒻᒪ ᓯᓚᑖᓃᖔᖅᑐᑦ ᐃᒥᖅ ᐊᑐᕇᖅᓯᒪᔪᖅ ᐊᒻᒪ ᐅᓯᕕᖓᓂ ᐃᒪᖃᖃᑦᑕᖅᑐᑦ ᐃᒥᕐᓂᑦ ᐊᑐᕇᖅᓯᒪᔪᓂᑦ ᐱᔪᓐᓇᖅᑎᑕᐅᔪᑦ.

ᐃᒦᑦ ᐊᑐᕇᖅᓯᒪᔪᑦ ᐃᓪᓗᒦᖔᖅᑐᓂᑦ ᐃᒥᖅ ᐊᑐᕇᖅᓯᒪᔪᖅ (ᑯᕕᑎᑕᐅᔪᑦ ᐅᐊᓴᕐᕕᓐᓂᑦ, ᐊᓐᓄᕌᓄ ᐅᐊᓴᕐᕕᒃ, ᐅᕕᓂᓐᓂᐊᕐᕖᑦ, ᐅᐊᓴᕐᕕᑦ ᐅᕝᕙᓘᓐᓃᑦ ᓂᕆᔾᔪᑎᓄᑦ ᐅᐊᓴᕐᕕᒻᒥᑦ) ᐱᔪᓐᓇᖅᑎᑕᐅᓇᑎ ᑭᓈᓄᐃᑦ ᐊᒻᒪ ᑯᕕᔭᐅᔪᑦ ᐊᐅᓚᐅᑎᓄᑦ ᐃᓂᖓᓃᖔᖅᑐᑦ ᐅᕝᕙᓘᓐᓃᑦ ᐃᖅᑲᓇᐃᔭᖅᕕᒋᔭᐅᔪᓂᑦ. ᐃᒦᑦ ᐊᑐᕇᖅᓯᒪᔪᑦ ᑯᕕᑎᑕᐅᔪᑦ ᓇᓗᓇᐃᔭᑦᒃᑎᐊᖅᓯᒪᖏᑦᑐᑦ ᐅᑭᐅᑕᖅᑐᒧ ᒪᓕᑦᑕᐅᔭᕆᐊᓕᓐᓂᑦ ᐊᑦᑕᑯᒋᔭᐅᔪᑦ ᐊᒻᒪ ᑕᐃᒪᐃᓐᓂᖓᓄᑦ ᓇᓗᓇᐃᔭᑦᑎᐊᖅᓯᒪᓂᖓ ᐱᑕᖃᕆᐊᖃᖅᑎᑕᐅᖏᒻᒥᔪᖅ. ¹⁴ 

ᒐᕙᒪᑐᖃᒃᑯᑦ ᐋᖅᑭᒃᓯᓯᒪᖕᒪᑕ ᐅᒥᐊᕐᔪᐊᓄᑦ ᐅᓯᔭᐅᔪᓐᓇᖅᑐᓂᒃ ᓱᕈᖅᑎᑦᑎᑦᑕᐃᓕᓂᕐᒧᑦ ᓄᓇᕗᒥᒃ. ᒪᓕᒐᖅᑎᒍᑦ ᓯᖁᒥᑦᑎᔪᑦ ᐅᕝᕙᓘᓐᓃᑦ ᑲᖐᒋᔭᐅᔪᑦ ᑯᕕᑎᑕᐅᔪᑦ, ᓲᕐᓗ ᐅᖅᓱᐊᓗᒻᒥ, ᐅᖅᓱᐊᓗᓕᒻᒥ ᐃᒥᕐᒥᑦ, ᑐᓴᖅᑎᑦᑎᒍᑕᐅᔪᓐᓇᖅᑐᑦ ᓄᓇᓕᒻᒥ ᐆᒪᔪᕐᓂᐊᖅᑎᒧᑦ ᐅᕝᕙᓘᓐᓃᑦ ᐸᓖᓯᒃᑯᓐᓄᑦ.

ᑭᓲᕙ ᒪᑭᑕᓪᓗᐊᕈᑎᖓᓄ ᐃᒪᖓ ᒪᑭᑕᓪᓗᐊᕈᑎᖓ ᑭᓱᑐᐃᓐᓇᐅᖅ ᐊᑐᖅᑕᐅᔪᖅ ᐅᒥᐊᕐᔪᐊᒥᑦ ᐊᑐᖅᑕᐅᓪᓗᓂ ᒪᑭᑕᓪᓗᐊᕐᓂᖓᓄᑦ ᐊᒻᒪ ᐃᖏᕋᑎᐊᕐᓂᖓᓄᑦ. ᑎᑭᑦᑎᔪᓐᓇᕐᓗᑎ ᐊᑦᑕᓇᖏᑦᑐᒥᑦ ᐅᖁᒪᐃᓐᓂᖓ ᐊᖏᓂᖓ ᐊᔾᔨᒌᖏᓐᓂᖓ, ᓂᐅᕋᐃᓯᒪᔪᑦ ᐅᒥᐊᕐᔪᐊᑦ ᒥᓪᓗᐊᓂᐊᖅᑐᑦ ᐃᒪᕐᒥᑦ ᒪᑭᑕᓪᓗᐊᕈᑎᖓᓄ ᐃᒪᖃᕐᕕᖓᓄᑦ ᐅᒥᐊᕐᔪᐊᒥᑦ, ᐊᒻᒪ ᑯᕕᑎᑕᐅᓗᑎ ᒪᑭᑕᓪᓗᐊᕈᑎᖓ ᑐᓚᑦᑕᕕᒻᒨᖅᑐᒧᑦ ᐋᖅᑭᒋᐊᖅᑕᐅᓗᑎ ᐅᓯᔭᐅᔪᓄᑦ ᐅᖁᒪᐃᓪᓕᒋᐊᕈᑎᖏᓐᓄᑦ. ¹⁵  ᑕᐅᓴᖏᓐᓃᑦᑐᑦ ᐃᒪᕐᒥᐅᑕᐃᑦ ᐆᒪᔪᐃᑦ ᐃᓗᐊᓃᒍᓐᓇᖅᑐᑦ ᐊᒻᒪ ᐅᒪᓂᖃᕐᓗᑎ ᒪᑭᑕᓪᓗᐊᕈᑎᖓᓄ ᐃᒪᖓᓂ, ᐱᖃᓯᐅᑎᓪᓗᑎ ᖁᕐᕈᕋᓛᑦ ᐊᒻᒪ ᐊᓯᖏᑦ ᒥᑭᔫᑎᑦ, ᒥᑭᔫᑎᑦ ᐱᕈᖅᑐᐃᑦ ᐃᒪᕐᒥ, ᐊᒻᒪ ᐊᔾᔨᒌᖏᑦᑐᑦ ᐃᒪᕐᒥᐅᑕᐃᑦ ᐱᕈᖅᑐᐃᑦ ᐊᒻᒪ ᐆᒪᔪᐃᑦ. ᑖᒃᑯᐊ ᐊᓯᐊᓃᖔᖅᓯᒪᔪᑦ ᐆᒪᔪᐃᑦ ᐅᑎᖅᑎᒐᔅᓴᐅᖏᑦᑐᓂᑦ ᓱᕋᐃᔪᓐᓇᖅᑐᑦ ᓄᓇᓕᒻᒥ ᐃᒪᖓᓂ ᐊᕙᑎᖓᓂ ᐊᒻᒪ ᑮᓇᖑᔭᓕᐱᓂᕐᒧᑦ ᐊᒻᒪᓗᑦᑕᐅᖅ ᐊᒥᓱᑦ ᓄᓇᖅᐸᓯᒻᒦᑦᑐᑦ ᑭᓱᓕᕆᔾᔪᑏᑦ ᐊᒻᒪ ᐱᔨᑦᑎᕋᐅᑏᑦ ᐱᒻᒪᕆᒋᔭᐅᔪᑦ ᓄᓇᓕᓐᓄᑦ.

ᒫᓐᓇᐅᔪᒥᑦ ᒪᓕᑦᑕᐅᔭᕆᐊᓖᑦ ᑲᓇᑕᒥ ᒪᑭᑕᓪᓗᐊᕈᑎᓄᑦ ᐃᒥᕐᓄᑦ ᒪᓕᑦᑕᐅᔭᕆᐊᓖᑦ (ᐋᖅᑭᒋᐊᖅᑕᐅᔪᖅ ᔫᓂ 2021) ᑭᓪᓕᖃᖅᑎᑦᑎᔪᑦ ᒪᑭᑕᓪᓗᐊᕈᑎᓄᑦ ᐃᒪᖏᓐᓄᑦ ᓴᖅᑭᑎᑦᑕᐃᓕᒪᓗᑎ ᐊᑦᑕᓇᖅᑐᓂᑦ ᐃᒪᕐᒥᐅᑕᓂᑦ ᐆᒪᔪᓂᑦ ᓄᓇᓕᒻᒧᑦ ᐃᒪᖓᓄ ᐊᕙᑎᖓᓄᑦ. ᒪᑭᑕᓪᓗᐊᕈᑎᓄᑦ ᐃᒪᖏᑦ ᓴᖅᑭᑎᑦᑎᕙᑦᑐᑦ ᐊᒻᒪ ᐊᐅᓪᓛᑎᑦᑎᓪᓗᑎ ᐱᖓᔪᖓᑦ (ᒥᑭᓛᕆᔭᖓ) ᖃᐅᔨᒪᔭᐅᔪᓕᒫᓂᑦ ᐊᓯᐊᓃᖔᖅᓯᒪᔪᑦ ᑲᓇᑕᒥ ᐊᒻᒪ ᓯᓚᕐᔪᐊᒥᑦ. ¹⁶  ᓄᑖᑦ ᒪᓕᑦᑕᐅᔭᕆᐊᓖᑦ ᓇᓗᓇᐃᖅᓯᔪᑦ ᐃᖏᕋᑎᑕᐅᓂᖓ ᐱᖅᑯᓯᑐᖃᕐᓂᑦ ᐊᑐᖅᑕᐅᔪᓂᑦ ᒪᑭᑕᓪᓗᐊᕈᑎᓄᑦ ᐃᒥᕐᓄᑦ ᐊᐅᓚᑦᑎᓂᕐᒧᑦ (ᐊᑭᓖᑎᑕᐅᓂᖏᑦᒪᑭᑕᓪᓗᐊᕈᑎᓄᑦ ᐃᒥᕐᓄᑦ ᐃᒪᐃᓐᓇᕐᒥᑦ, ᐅᕝᕙᓘᓐᓃᑦ ᐅᖓᓯᓐᓂᖅᓴᒥᑦ 200 ᐃᒪᒃᑯᑦ ᒪᐃᔪᔅ ᓄᓇᒥᑦ) ᐊᑐᕐᓗᒍ ᐅᓪᓗᒥᒨᖓᔪᖅ ᒪᑭᑕᓪᓗᐊᕈᑎᓄᑦ ᐃᒥᕐᓄᑦ ᐊᐅᓚᑦᑎᓂᕐᒧᑦ ᐊᑐᖅᑕᐅᔪᑦ ᐊᒻᒪ ᐊᖏᖅᑕᐅᓯᒪᔪᖅ ᒪᑭᑕᓪᓗᐊᕈᑎᓄᑦ ᐃᒥᕐᓄᑦ ᐊᐅᓚᑦᑎᓂᕐᒧᑦ ᐸᕐᓇᐅᑦ.

ᒪᑭᑕᓪᓗᐊᕈᑎᓄᑦ ᐃᒥᕐᓄᑦ ᐊᑐᖅᑕᐅᔪᑦ ᓄᓇᕗᒻᒥ ᐅᓯᖃᑦᑕᖅᑐᑦ ᐅᒥᐊᕐᔪᐊᑦ (ᐊᔫᑎᓂᑦ ᐅᓯᔪᑦ, ᐅᓯᖃᑦᑕᖅᑐᑦ ᐅᒥᐊᕐᔪᐊᑦ, ᐅᖅᓱᐊᓗᑦᑕᐅᑏᑦ) ᐅᒥᐊᕐᔪᐊᑐᐊᖑᔪᑦ ᒪᑭᑕᓪᓗᐊᕈᑎᓄᑦ ᐃᒥᕐᓂᑦ ᑯᕕᑎᑦᑎᓗᑎ ᓄᓇᕗᑦ ᐃᒪᖏᓐᓂ. ¹⁷  ᐊᒥᓱᒐᓚᐃᑦ ᐊᓯᐊᓃᖔᖅᓯᒪᔪᑦ ᐆᒪᔪᐃᑦ ᖃᐅᔨᔭᐅᓯᒪᔪᑦ ᐊᕙᑎᖓᓂ ᐅᓪᓗᒥᒧᑦ ᑎᑭᑦᑐᒍ, ᑭᓯᐊᓂ ᐊᒥᓱᒐᓚᐃᑦᑕᐅᖅ ᑎᑎᕋᖅᑕᐅᓯᒪᒐᓗᐊᖅᑎᓪᓗᒋᑦ ᒪᑭᑕᓪᓗᐊᕈᑎᖏᓐᓂ ᐃᒪᖏᓐᓂ ᐅᒥᐊᕐᔪᐊᓂᑦ ᐃᖏᕋᕙᑦᑐᓂᑦ ᑲᓇᑕᐅᑉ ᐅᑭᐅᑕᖅᑐᖓᒍᑦ.

ᓯᑎᐱᕆᐅᓕᖅᑎᓪᓗᒍ 2024, ᐊᑕᖏᖅᑐᑎ ᐅᒥᐊᖅᔪᐊᑦ ᐊᐅᓚᑦᑎᔪᑦ ᑲᓇᑕᐅᑉ ᐃᒪᖏᓐᓂ (50 ᒦᑕᓂᑦ ᑕᑭᓂᖃᕈᑎ ᐅᕝᕙᓘᓐᓃᑦ ᑕᑭᓂᖅᓴᐅᒍᑎ ᐊᒻᒪ ᓴᓇᔭᐃᓯᒪᔪᑦ ᑭᖑᓂᐊᒍᑦ 2009) ᐋᖅᑭᔅᓯᔭᕆᐊᓖᑦ ᒪᑭᑕᓪᓗᐊᕈᑎᓄᑦ ᐃᒪᖏᓐᓄᑦ ᐊᐅᓚᑦᑎᓂᕐᒥᑦ ᐊᑐᖅᑕᐅᔪᒥᑦ ᐅᒥᐊᕐᔪᐊᒥᑦ, ᓴᓗᒻᒪᖅᓴᐃᕙᑦᑐᑦ ᒪᑭᑕᓪᓗᐊᕈᑎᓄᑦ ᐃᒪᖏᓐᓂ ᐊᓯᐊᓃᖔᖅᓯᒪᔪᓂᑦ ᐆᒪᔪᓂᑦ ᑯᕕᑎᑕᐅᓚᐅᖅᑎᓐᓇᒋᑦ. ᐱᑐᖃᐅᓂᖅᓴᐃᑦ, ᐃᒪᐃᓐᓇᒃᑰᖅᐸᖏᑦᑐᑦ ᐊᓯᖏᓐᓄᑦ ᐱᔪᓐᓇᖅᑎᑕᐅᔪᑦ ᑎᑭᒐᓱᐊᕐᓂᖓᓄ 2030.

ᒪᑭᑕᓪᓗᐊᕈᑎᖏᓐᓄᑦ ᐃᒪᖏᓐᓄ ᑯᕕᑎᑕᐅᓂᖏᓐᓄᑦ ᓇᒦᓐᓂᖏᑦ ᓯᓚᑲᒻᒪᐅᒍᓂ ᐅᕝᕙᓘᓐᓃᑦ ᐊᓯᖏᓐᓄ ᐊᑦᑕᓇᖅᑐᓂᑦ ᐃᓱᒫᓘᑕᐅᔪᓂᑦ ᑯᕕᑎᑦᑎᖏᓪᓗᑎ ᐃᒪᐃᓐᓇᕐᒥ, ᐅᒥᐊᕐᔪᐊᑦ ᐊᓯᔾᔩᑎᑦᑎᓂᖃᕈᓐᓇᖅᑐᑦ ᐊᓯᐊᓂ ᒪᑭᑕᓪᓗᐊᕈᑎᓄᑦ ᐃᒪᖏᓐᓄᑦ ᐊᑭᓖᑎᑦᑎᕕᒻᒥ ᑭᓪᓕᖓᓂ (ABWEZ) ᐃᓗᐊᓂ ᓇᓗᓇᐃᖅᓯᒪᔪᒧᑦ ᑮᓇᐅᔭᓕᐅᕋᓱᐊᓂᕐᒧᑦ ᑭᓪᓕᖓ (EEZ) ᑲᓇᑕᒥ. ¹⁸ 

ᐅᒥᐊᕐᔪᐊᖅ ᐅᑭᐅᑕᖅᑐᒨᕈᓂ ᑲᓇᓐᓇᖓᓄ, ᒪᑭᑕᓪᓗᐊᕈᑎᖓᓄ ᐃᒪᖓ ᐅᓯᔾᔨᖅᑕᐅᔭᕆᐊᓕᒃ ᓇᒦᓐᓂᖃᖅᑐᒥᑦ ᐃᒪᕐᒥ ᐅᖓᑖᓂ 1,000 ᒦᑕᐃᑦ ᐃᑎᓂᖓ ᐊᒻᒪ 50 ᐃᒪᒃᑯᑦ ᒪᐃᔪᔅ ᐅᕝᕙᓘᓐᓃᑦ ᐅᖓᓯᓐᓂᖅᓴᒥᑦ ᓄᓇᒥᑦ. ᐅᒥᐊᕐᔪᐊᖅ ᐅᑭᐅᑕᖅᑐᒨᕈᓂ ᐅᐊᓐᓇᖓᓄ, ᒪᑭᑕᓪᓗᐊᕈᑎᖓᓄ ᐃᒪᖓ ᐅᓯᔾᔨᖅᑕᐅᔭᕆᐊᓕᒃ ᓇᒦᓐᓂᖃᖅᑐᒥᑦ ᐃᒪᕐᒥ ᐅᖓᑖᓂ 100 ᒦᑕᐃᑦ ᐃᑎᓂᖓ ᐊᒻᒪ ᐅᖓᓯᒐᓱᐊᕐᓗᓂ ᓄᓇᒥᑦ ᑕᐃᒪᐃᒍᓐᓇᑎᓪᓗᒍ.

ᒪᓕᒐᖅᑎᒍᑦ ᐊᑐᖅᑕᐅᒐᔪᑦᑐᖅ ᓴᐳᒻᒥᑎᓪᓗᓂ ᐃᓄᓐᓂᑦ ᐱᔪᓐᓇᐅᑎᖏᓐᓂ ᐃᖏᕋᔪᓐᓇᓂᕐᒧᑦ, ᐃᓄᓐᓂᑦ ᐃᓱᒪᐃᓐᓇᕿᑎᑦᑎᔪᑦ ᐊᒻᒪ ᐸᕕᓴᑦᑕᐅᖏᓪᓗᑎ ᐊᖅᑯᑎᖓ ᐃᖏᕋᕕᐅᔪᒃᑯᑦ ᐃᒪᒃᑯᑦ.

NORDREG ᑭᓪᓕᖓ ᓴᖅᑭᖅᑎᑕᐅᓚᐅᖅᓯᒪᔪᖅ ᐊᑖᓂ ᐅᑭᐅᑕᖅᑐᒥ ᑲᓇᑕᒥ ᐅᒥᐊᕐᔪᐊᓄᑦ ᐃᖏᕋᔪᓄᑦ ᐱᔨᑦᑎᖅᑕᐅᔪᓂᑦ ᑭᓪᓕᖓ ᒪᓕᑦᑕᐅᔭᕆᐊᓖᑦ ᐊᒻᒪ ᐅᖓᑕᐅᔾᔨᔪᖅ ᐃᒪᖅᐸᓯᒻᒧᑦ 200 ᐃᒪᒃᑯᑦ ᒪᐃᔪᔅ ᑭᓕᖓ ᑲᓇᑕᒧᑦ ᑐᕌᖓᔪᖅ ᑮᓇᐅᔭᓕᕆᓂᕐᒧᑦ ᑭᓪᓕᖓ (EEZ). ᐊᑖᓂ ᑖᒃᑯᓇᓂ ᒪᓕᑦᑕᐅᔭᕆᐊᓕᓐᓂᑦ, ᓇᓗᓇᐃᖅᓯᔪᑦ ᐅᒥᐊᕐᔪᐊᑦ ᑐᓴᖅᑎᑦᑎᒍᑎᖃᕆᐊᓖᑦ ᑐᑭᓯᒋᐊᕈᑎᓂᑦ ᐃᓯᓚᐅᖅᑎᓐᓇᒋᑦ, ᐃᖏᕋᓂᖃᖅᑎᓪᓗᒋᑦ ᐃᓗᐊᓂ, ᐊᒻᒪ ᐊᓂᓕᖅᑎᓪᓗᒋᑦ ᑲᓇᑕᐅᑉ ᐅᑭᐅᑕᖅᑐᖓᓂ ᐃᒪᖏᓐᓂ. ᑐᓴᒐᒃᓴᐅᑎᑕᐅᔪᑦ ᐃᓚᖃᓚᐅᕐᑐᑦ ᖃᓄᐃᓕᖓᓂᖏᓐᓂᒃ, ᓇᒧᙵᐅᕙᖕᓂᖏᓐᓂᒃ, ᓱᒃᑲᓕᕙᖕᓂᖏᓐᓂᒃ, ᓯᑯᓯᐅᖃᑦᑕᕐᓂᖏᓐᓂᒃ, ᐊᖅᑯᑎᒋᔭᕆᐊᖃᖅᑕᖏᓐᓂᒃ ᐊᒻᒪᓗ ᒪᓕᒋᐊᖃᕐᓂᖏᓐᓂᒃ ᓱᕈᖅᑎᑦᑎᑦᑕᐃᓕᓂᕐᒧᑦ ᐱᖁᔭᓂᒃ, ᐃᓚᖃᖅᖢᑎᒃ ᑕᕆᐅᕐᒧᐊᖅᑎᑦᑎᖃᑦᑕᕐᓂᕐᒥᒃ.

ᐅᒥᐊᕐᔪᐊᓕᒫᑦ ᓄᓇᓕᕐᔪᐊᖃᖅᑐᑦ ᑎᑭᑦᑎᔭᕆᐊᓖᑦ ᑲᓇᑕᐅᑉ ᐊᑐᐊᒐᖏᓐᓂ ᐅᒥᐊᑉ ᐊᑎᖏᓐᓄᑦ ᓴᖏᓂᖏᓐᓄᑦ ᐊᒻᒪ ᐊᐅᓚᐅᑎᖏᓐᓄᑦ ᓴᖏᓂᖏᓐᓄᑦ ᐃᓯᓚᐅᖅᑎᓐᓇᒋᑦ NORDREG ᑭᓪᓕᖓ, ᐊᒻᒪ ᒪᓕᓐᓂᖃᖅᑐᑦ ᐅᒥᐊᕐᔪᐊᑦ ᕿᒪᐃᒐᔪᑦᑐᑦ NORDREG ᑭᓪᓕᖓᓂ ᐃᓗᐊᓂ ᖃᖓᒃᑰᓂᖓᓄ ᐋᖅᑭᑦᑕᐅᓯᒪᔪᒥᑦ ᐊᑦᑕᓇᖏᑦᑐᒥ ᐃᖏᕋᓂᕐᒧᑦ.

ᐃᒪᕐᒥ ᐊᑦᑕᓇᐃᖅᓯᒪᓂᕐᒧᑦ ᐱᓕᕆᕕᖓ ᐃᖏᕋᔪᓕᕆᔨᒃᑯᑦ ᑲᓇᑕᒥ ᓪᓕᐅᒃᑯᒫᓂ ᐱᖃᓯᐅᔾᔨᔪᓄᑦ ᐅᒥᐊᕐᔪᐊᓄᑦ ᐅᓯᔪᓄᑦ ᖃᓄᐃᑦᑐᑐᐃᓐᓇᕐᓂᑦ ᓱᕈᐃᔪᓐᓇᖅᑐᓂᑦ ᐱᑕᖃᕆᐊᖃᖅᑎᑎᒻᒥᔪᑦ ᓇᓗᓇᐃᖅᓯᒍᑎᒥᑦ ᓇᓪᓕᐅᒃᑯᒫᓂ ᐱᖃᓯᐅᔾᔨᔪᓄᑦ ᐅᒥᐊᕐᔪᐊᓄᑦ ᐅᓯᔪᓄᑦ ᖃᓄᐃᑦᑐᑐᐃᓐᓇᕐᓂᑦ ᓱᕈᐃᔪᓐᓇᖅᑐᓂᑦ ᐊᖏᔫᑎᓂᑦ, ᐃᓯᔭᐅᑎᓪᓗᒋᑦ ᐅᕝᕙᓘᓐᓃᑦ ᐅᖅᓱᐊᓗᒋᔭᐅᓪᓗᑎ. ᑖᓐᓇ ᓇᓪᓕᐅᒃᑯᒫᖅ ᐃᓚᒋᒃᑲᓂᖅᑕᖓ ᓯᓚᕐᔪᐊᒥ ᑎᒥᐅᔪᖅ ᓇᓪᓕᐅᒃᑯᒫᖃᖅᑎᑦᑎᔪᑦ ᐅᖅᓱᐊᓗᑦᑕᐅᑎᓄᑦ ᐃᓯᔪᓂᑦ ᐅᖅᓱᐊᓗᓐᓂᑦ.

ᑖᒃᑯᐊ ᐅᓂᒃᑳᑦ ᓄᓇᖑᐊᖅ ᓇᓗᓇᐃᔭᐃᓂᖃᖅᑎᑦᑎᔪᑦ ᐊᐅᓚᑕᐅᓂᖏᓐᓄᑦ ᑮᓇᐅᔭᓕᐅᕋᓱᐊᓂᕐᒧᑦ ᐃᒪᕐᑯᑦ ᐅᒥᐊᕐᔪᐊᓕᕆᓂᕐᒧᑦ ᐃᒪᖏᓐᓂ ᓄᓇᕗᑦ. ᐅᑯᐊ ᒪᓕᒐᐃᑦ ᑐᕌᖓᓇᓱᐊᖅᑐᑦ ᒪᓕᑦᑕᐅᔭᕆᐊᓖᑦ ᐱᔾᔪᑎᖃᖅᑐᓂ ᐃᒪᕐᒥ ᐅᒥᐊᕐᔪᐅᓕᕆᓂᕐᒧᑦ ᐱᔭᔅᓴᐅᓂᖅᓴᐅᓗᑎ ᓄᓇᓕᓐᓄᑦ ᓄᓇᕗᒻᒥ. ᑕᒪᓐᓇ ᑕᐃᒪᐃᒍᓐᓇᕋᔭᓚᐅᖏᑦᑐᖅ ᐱᓕᕆᖃᑕᐅᔪᓂ ᐃᓚᐅᖃᑕᐅᓂᖏᑉᐸᑕ ᐊᒥᓱᑦ ᓄᓇᓕᒻᒥᐅᑕᐃᑦ ᐊᒻᒪ ᑐᓴᖅᑎᑦᑎᓂᖏᓐᓄᑦ ᐅᑯᐊ ᓴᖅᑭᖅᑎᑕᐅᓂᖏᓐᓄᑦ ᐱᒻᒪᕆᐅᓚᐅᖅᑐᑦ ᐊᒻᒪ ᖁᕕᐊᒋᔭᐅᒻᒪᕆᑦᑐᑎ. ᐅᑯᐊ ᐊᑐᐊᒐᐃᑦ ᐅᓂᒃᑳᑦ ᓄᓇᖑᐊᖅ ᑐᓂᖓᕕᒋᔭᖓ, ᐱᔭᔅᓴᐅᔪᑦ ᐅᕙᓂ.

 _{1. Dawson, J., Copland, L., Mussells, O., and Carter, N. (2017). S hipping Trends in Nunavut 1990-2015: A report prepared for the Nunavut General Monitoring Program.    2. Transport Canada. (2019).  Preparedness and response for ship-source oil spills.     3. Clear Seas Centre for Responsible Marine Shipping. (2020a).  Responding to oil spills.     4. van Luijk N., Dawson J., & Cook A. (2020). Analysis of heavy fuel oil use by ships operating in Canadian Arctic waters from 2010 to 2018. FACETS, 5. 304-327.    5. WWF. (2017).  Oil spill response capacity in Nunavut and the Beaufort Sea.     6. Government of Canada. (2021).  Canadian Coast Guard completes 2021 Arctic operational season .    7. Canadian Coast Guard. (2021).  What is the Canadian Coast Guard Auxiliary?     8. Canadian Coast Guard. (2019).  Inshore Rescue Boat station locations.    9. Government of Nunavut. (n.d.)  Spill response.     10. Government of Canada. (2019).  Maritime Search and Rescue (SAR) in Canada.     11. Benoit, L. (2014). Perspectives on Emergency Response in the Canadian Arctic: Sinking of the MS Arctic Sun in Cumberland Sound, Nunavut.  Part C: Findings of the Hypothetical Scenario. Munk-Gordon Arctic Security Program.     12. Transport Canada. (2020).  Understanding anchorages in Canada.    13. Clear Seas Centre for Responsible Marine Shipping. (2020b). Anchors away:  Understanding the issues about ships at anchor.}     ^{14. VARD. (2018).  Canadian Arctic grey water report: Estimates, forecasts, and treatment technologies.}     _{15. Clear Seas Centre for Responsible Marine Shipping. (2021).  Ballast water management: Stopping the spread of invasive species by ships.    16. Stewart, D.B., Nudds, S.H., Howland, K.L., Hannah, C.G., and Higdon, J.W. (2015). An ecological and oceanographical assessment of alternate ballast water exchange zones in the Canadian eastern Arctic. DFO Canadian Science Advisory Secretariat. Research Document 2015/037.   17. Chan, F.T., Bronnenhuber, J.E., Bradie, J.N., Howland, K., Simard, N., and Bailey, S.A. (2012).  Risk assessment for ship-mediated introductions of aquatic nonindigenous species to the Canadian Arctic. DFO Canadian Science Advisory Secretariat.  Research Document 2011/105.   18. Goldsmit, J., Nudds, S. H., Stewart, D. B., Higdon, J. W., Hannah, C. G., & Howland, K. L. (2019).  Where else? Assessing zones of alternate ballast water exchange in the Canadian eastern Arctic . Marine Pollution Bulletin, 139, 74–9.   19. UN General Assembly. (1982).  Convention on the Law of the Sea.    20. Canada Border Services Agency. (2021).  Reporting requirements for private boaters.}  

 _{Arctic Shipping Safety and Pollution Prevention Regulations (SOR/2017-286)   Arctic Waters Pollution Prevention Act (R.S.C., 1985, c. A-12)   Ballast Water Regulations (SOR/2021-120)   Canada Shipping Act, 2001 (S.C. 2001, c. 26)   Northern Canada Vessel Traffic Services Zone Regulations (SOR/2010-127)   Shipping Safety Control Zones Order (C.R.C., c. 356)}