Korsou ta kambia

Ora ku su muhé Chrissy a nase algun aña despues, el a disidí di stòp ku su trabou komo eksperto di mal tempu, pronostikadó i buskadó di tormento, pa e bira dosente.

Komo dosente e por a pasa mas tempu na kas ku Chrissy. Ademas e lo ta leu for di e peliger direkto di bai buska áreanan di tormenta den Karibe. Sí el a keda disponibel pa Meteo den kaso spesial, i esaki ta un di nan.

E rekuerdonan di 2010 ta bin ariba i dominá su pensamentunan i e stèm preokupá di meteorólogo Girigorie no a yuda masha pa kita nan for di su mente. Unabes ku el a yega Mahuma, e ta baha for di su pikòp i kana bai paden. Un hòmber di edat ta habri porta p’e.

"Bonbiní, mener Terry, muchu gustu, mi nòmber ta Alejandro."

"Muchu gustu, Alejandro, ta un plaser pa porfin topa bo personalmente."

"Mener Terry, bonbiní!" un stèm femenino ta bisa.

"Kompañá mi bai paden." Ta meteorólogo Girigorie. Nan ta mira e seriedat den otro su kara i huntu ta kana drenta un sala yen di kòmpiuter i pantaya.

Un pantaya grandi meimei ta mustra un mapa di region Karibe ku pronóstiko di un orkan biniendo derechitu pa islanan ABC.

"Esaki ta e motibu dikon mi a yama bo," Girigorie a bisa. "Siman pasá nos a papia kaba tokante e kambionan ku ta tumando lugá na nos isla. Nos a pensa ku lo a bin ménos tormenta, pero ku nan lo bira mas pisá. Esaki ta un di nan."

Alejandro i Terry ta fiha nan bista riba e pantaya ku wowonan hanchu di spantu. Terry ta skirbi algu riba un pida papel i duna Alejandro. E ta teip algu i e modelo riba e kòmpiuter ta kuminsá move pokopoko.

Un orkan ta bai pasa riba e islanan kasi den su totalidat. Nan sa ku e lo ta un tormenta mas pisá ku normal i ku e lo por kousa hopi daño.

"Awor ta ora," Terry ta bisa ku stèm serio.

"Nos mester atvertí tur hende pa prepará. Aki algun dia e ta pasa i nos lo sinti su efektonan sigur."

E meteorólogonan ta kuminsá traha mesora. Den tempu rápido ta atvertí gobièrnu, ku ta transmití un boletin ofisial ku instrukshon pa habitantenan kuminsá prepará nan mes.

Tsean i su mama Ella ta mira e boletin na televishon. Ella mester bai hòspital pa yuda komo boluntario. Tseans su tata ya tin dos dia ta for di kas pa motibu di su trabou riba laman.

Ella ta bèl Lisa i dun’é instrukshon pa kuida Tsean i hib’é un lugá mas seif, pasobra nan kas ta kantu di laman i e lo ta den peliger si laman subi tera.

Nubianan skur ta krese na horizonte i bientu ta bira kada be mas fuerte. Lisa, ku semper ta para kla pa yuda hende, tambe ta prepará tur kos na su kas.

Promé ku e sali bai, e ta resa un orashon lihé lihé pa protekshon di su kas i e ta bai ku Tsean e sala di gemnastik di un skol sekundario ku ta fungi komo un refugio temporal.

Omar, e kunukero di Dam Pretu, ta mira su mata- i palunan move bai bin den e bientu ku ta bira kada be mas fuerte.

E tambe ta pèrkurá pa su famia ta seif i nan ta bai e refugio. E palunan di koko haltu i e konstrukshonnan di palu riba su tereno por kousa hopi daño si e bientu bai ku nan.

Jay i Emma, e dos sambuyadónan, ta tende di e tormenta ku ta biniendo i ta disidí mesora ku nan mester yuda. Nan ta pone nan ekipo kla pa kualke operashon di reskate i yuda piskadó den besindario pa hisa nan botonan bin tera kuné.

Mientrastantu Lisa, Tsean i Luka ta sintá den outo. Nan a bin buska Luka pasobra su tata ku ta bombero, mester a bai traha.

Nan ta bayendo e refugio ora e promé gotanan di awa ta kuminsá kai. Lisa ta purba trankilisá e muchanan ku storia tokante tormentanan den pasado ku semper a spar Kòrsou.

Unabes ku nan a yega e refugio, personal di Krus Kòrá ta bin risibí nan. Aya nan ta topa ademas Chrissy ku su mama i Omar ku su famia.

E tormenta razu ta pasa ku ráfaganan fuerte di bientu riba e isla. Kamindanan ta inundá, palu ta kai, i wayanan di koriente ta kai kibra. Edifisionan na Punda i Otrobanda ta bou di awa i tin káos tur kaminda.

Den e refugio tin kada be mas i mas hende, entre nan Alejandro i Mener Terry. Chrissy ta kore bai serka su tata i bras’é. Nan ta purba trankilisá tur hende splikando kiko ta pasando i kiko por spera ainda. Nan ta enfatisá e konsekuensianan di un tipo di orkan asina, manera eroshon kousá pa awa i sedimento ku huntu ta lastra bai laman, i ku sigur lo tin impakto pisá riba naturalesa i ekonomia di e isla.

Apesar di su preokupashonnan personal, Lisa ta pèrkurá bon pa e muchanan i ta yuda kaminda e por. E ta motivá otronan pa no pèrdè kurashi i yuda personal di Krus Kòrá parti kuminda ku awa. Omar i su famia ta kanta i entretené tur hende ku storianan di Kompa Nanzi.

Tsean ta haña un yamada di su mama Ella ku ta bisa ku tur kos ta bon kuné i ku asina e orkan pasa e ta bin serka dje. Luka tambe ta tende di su tata. Tur e dos mucha hòmbernan ta trankil awor.

Finalmente Jay i Emma ta yega e refugio, kansá pero satisfecho. Nan esfuersonan a salba hopi bida, entre otro esun di Buchi, e piskadó ku kasi a pèrdè su bida huntu ku su boto den e tormenta. Pero awor nan mes a bin pa buska refugio i trankilidat.