Kòrsou ta kambia
Tsean i nivel di laman
Tsean i su mihó amigu Luka ta biba pegá ku laman. Nan gusta bai playa huntu. Ta nan lugá faborito pa hunga, landa i spesialmente pa snòrkel. Nan a palabrá pa bai playa djasabra mainta. Pero awe lo ta otro for di tur otro dia.
![](https://cdn.arcgis.com/sharing/rest/content/items/ed8e39b2cf214d06893226ad93e5fa86/resources/Db7F0NwK-1hfD0MoCHN8X.png?w=20)
Ora nan yega kantu di laman, nan ta ripará mesora ku laman ta mas yen ku normal. Un parti di e playa su santu a disparsé i olanan ta yega mas serka di e lugá kaminda semper nan ta pone nan tas.
"Kiko a pasa?" Luka ta puntra asombrá.
"Mi no sa," Tsean ta kontestá, miéntras e ta fiha riba e olanan.
“Mira,” Tsean ta mustra den direkshon di laman.
“E ta bin mas serka i ta trese piedra kantu, ta kon por ta?”
![](https://cdn.arcgis.com/sharing/rest/content/items/ed8e39b2cf214d06893226ad93e5fa86/resources/pQpaVANxJF45-l4pcHMCs.png?w=20)
Nan ta keda wak e playa asombrá, pero di repiente Luka ta bisa entusiasmá:
"Podisé Mener Terry sa!" E sa masha hopi mes di mundu, bo ta kòrda ku djaweps el a konta ku nos ku klima ta kambiando?”
”Si, bèrdat!” Tsean ta bisa eksitá.
"Mener Terry ta biba pegá aki, tòg! Ban, laga nos bai serka dje!”
![](https://cdn.arcgis.com/sharing/rest/content/items/ed8e39b2cf214d06893226ad93e5fa86/resources/358381e5-5fe0-4c18-afb2-f3951950ac4d.jpeg?w=20)
Nan ta piki nan tas i kohe kaminda pa kas di Mener Terry, ku ta biba serka. Mener Terry ta nan mener di skol ku sa masha hopi di tur materia, banda di su konosementu spesífiko di geografia, naturalesa i medio ambiente.
Ora nan yega serka dje, nan ta mir’é ta planta un palu den su kurá.
"Mener Terry, bon tardi!"
"Mener Terry por konta nos kiko ta pasando ku e kosta di e playa akibanda?" Tsean ta puntra.
Mener Terry ta pone su skòp abou i aserká nan kariñosamente.
“Sigur ku sí muchanan! Mi ta wak ku bosnan a kaba di bini for dj’eibanda. Mi tambe a mira algu similar awemainta ora mi tabata sintá den mi veranda patras di kas. Esaki ta konsekuensia di subimentu di e nivel di laman. Kambio di klima ta bai kompañá mundialmente ku subida di nivel di laman i esei tin influensia na Kòrsou tambe."
Miéntras nan ta kana drenta su kurá, mener Terry ta bai paden i bin bèk pafó ku un átlas. E ta bòltu blachi yega na un mapa mundial i mustra nan, miéntras e ta splika.
"Pa motibu di keintamentu di tera, e kapanan di eis ta dirti i mas awa ta drenta den oséano. Esaki ta pone ku e nivel di laman ta subi i e awa di laman ta drenta mas leu riba tera, loke boso a ripará awe kant’í laman.”
"Pero kiko ta pasa e ora ei ku nos playa i laman?" Luka ta puntra preokupá.
"Ora nivel di laman subi, vários kos por sosodé," Mener Terry ta splika.
"Na promé lugá awa di laman por subi tera. Esaki ta nifiká ku tur loke e topa, manera kayanan, ta bai keda bou di awa. I no solamente esei, e sushi ku e topa riba su kaminda ta laba bai laman. Loke na su turno ta bai susha nos Laman Karibe.”
"Esei no ta pinta bon," Tsean ta bisa.
"Nò, sigur ku nò," Mener Terry ta konfirmá.
“Baidewei, boso ke un glas di awa?” e ta puntra nan amablemente.
"Naturalmente! Ta kalor, pues un glas di awa bon friu lo baha hopi bon aworakí!” Luka ta bisa harí.
Miéntras e ta basha awa pa e muchanan, e ta sigui konta: “Boso tabata sa ku pa motibu di subida di e nivel di laman e awa dushi ku nos ta usa pa muha mata i pa bebe ta bai bira mas salu? Esei ta malu pa nan, pero tambe pa nos ku ta beb’é.’’
E muchanan ta bebe nan awa ku smak pero nan ta skucha alabes ku atenshon.
“Kosta por erodá tambe. Esei ta nifiká ku e santu blanku bunita ku nos tin awor ainda, ta bai resultá den laman. I e bestianan ku mester di e santu pa nan sobrebibí, manera turtuga, por haña nan ku problema, pasobra nan no tin un lugá mas pa pone webu.”
"I kiko ta pasa ku e hotèl- i edifisionan situá kantu di laman?" Luka ta puntra.
“Wèl, si laman inundá e playanan di santu, esei por tin konsekuensia negativo pa turismo. Hopi di nos establesimentunan kantu di laman, pero tambe e edifisionan bunita kant’i awa na Punda i Otrabanda, por haña daño òf olanan hasta por lastra nan bai laman kuné, si e subida di e nivel di laman bai kombiná ku mal tempu òf orkan, algu ku por sosodé. Ménos turista lo bin Kòrsou e ora ei, miéntras ku e hendenan ku ta traha den e hotèlnan akí tur lo pèrdè trabou.”
“Ai nò, Mener Terry, esaki ta zona fututu. Kiko nos por hasi pa evitá esei?" Tsean ta puntra, preokupá.
"No tin solushon fásil," Mener Terry ta bisa halando un rosea profundo.
"Nos por purba adaptá nos manera di biba i kuminsá protegé nos edifisionan kontra di e kambionan ku ta bai bini. Pero loke ta mas importante ta pa nos traha huntu pa redusí e efektonan di e kambio di klima ku ta na kaminda."
"Pero esei mi ta konta boso djaluna, pasobra mi ta wak riba mi Smartwatch ku Servisio Meteorológiko ta yamando mi nèt aworakí.”
Mener Terry ta fiha su bista tur preokupá riba su oloshi i e ta kana bai paden pa kohe su telefòn.
“Ban, Luka, laga nos bai kas numa, nos ta bai laman un otro biaha.”
“Si, esei ta parse mi un bon idea, Tsean. Ban lastra!”
Un ratu despues nan ta yama Mener Terry danki i kana bai kas na pia. Ya ta mèrdia, na kaminda ta hasiendo hopi kalor, e asfalt ta kayente bou di nan pia i nan ta sodando papapapa.
“Ta hasi hopi kalor, sua! Bo n’ ta haña?” Luka ta puntra Tsean.
“Sigur sigur, solo ta ta kima sin miserikòrdia!"
"Esaki tambe lo tin di haber ku kambio di klima, bo ta kere?” Tsean ta puntra Terry preokupá.
“Mi no sa, pero laga nos puntra Mener Terry djaluna,” Luka ta bisa purá.
“Aki nos kaminda ta parti: te djaluna.”
Lihé nan ta kana bai nan kas pa sali mas lihé posibel for di e higra di solo riba nan kabes.